TURA: West Khasi Hills a·jao Shallang-oni Khalu-ona Rengdim song gita dakanggipa PMGSY rama aro dolongrangko taria matchotchipkujaengani a·sel songni nokni manderang, re·a doanirango neng·nikanirangko chagrongna nangtokenga ine West Khasi Hills a·jani United A·chik Youth Federation (UAYF) aro All Khasi Hills Nokma Welfare Association (AKHNWA) parakatenba, ia rama aro dolongrangko ta·rake matchotate on·china a·dokni Chief Minister Conrad K Sangma-ko didiataha.
UAYF aro AKHNWA-ni Chief Minister-na sedoatgipa chittio parakatani gitade, Shallang-oni Khalu-ona Rengdim gita dakanggipa PMGSY ramako bilsi 10 batpile matchotchipgija donengani a·sel songni nokni manderang, re·a doanirango neng·nikanirangko chagrongna nangtokenga.
“Ia kilometer 29-30-mang ong·gipa ramako Rengdim songonade tong·sako matchotahachim indiba Rengdim songni ja·mande rama tariako matchotatchipgija donenga. Khalu A songona a·a bakani kamrangko 2012-2014 bilsirangode matchotaha indiba da·alonan kamrangko matchotatchipgija donenga,” ine UAYF aro AKHNWA-ni dilgiparang, Chief Minister-na sedoatgipa chittio parakataha.
Ia apsan ramaon dam 4 ba dam 5 dolongrangko tariengachim indiba da·alonan ia dolongrangko matchotchipkujaenga ineba UAYF aro AKHNWA parakataha.
“Ia dolongrangko matchotchipkujaengani a·selan ia jolrango songdongenggipa manderang, Shallang Bazar-ona km 13-16-mang ong·gipa ramako ja·achisa re·e bazaar anti cha·na nangtokenga aro an·tangtangni game ge·e man·gipa bosturangkoba ra·ange palna sim·na nangenga,” ine dolgni NGO-rang parakatenba, ia rama aro dolongrangko ta·raken matchotate on·china a·dokni Chief Minister-ko mol·molataha.