TURA: Khasi Hills-o District Selection Committee (DSC)-ni gita kamrangna ra·anio Language Proficiency Test-na Garo ku·sikko ra·kujaengani a·sel Khasi Hills-o songdongenggipa A·chik chadamberangde kamrangko man·pajaenga ine West Khasi Hills a·jani United A·chik Youth Federation (UAYF) aro All Khasi Hills Nokma Welfare Association (AKHNWA) Rengdim Unit parakatenba, Khasi Hills-o songdongenggipa A·chik chadamberangni namgnina DSC-o Garo ku·sikko man·chapatchina a·dokni Chief Minister Conrad K Sangma-ko didiataha.
“Khasi Hills-o chengonin A·chikrangba songdong a·chagiparang ong·a indiba Khasi Hills-o DSC-ni gita kamna ra·anio Garo ku·sikkode Language Proficiency Test-o ra·kujaengani a·sel A·chik ku·sikko aganpagipa candidate-rangde kamna dorgasto galanio neng·nikanirangko chagrongna nangtokenga,” ine UAYF aro AKHNWA Rengdim unit parakataha.
UAYF aro AKHNWA-ni parakatani gitade, Khasi Hills-o songdongenggipa bang·bata A·chik chadamberangan Khasi ku·sikko aganna aro sena man·pagijagiparangsa ong·e, DSC-ni kamna porikkarangko aro interview-rangko ra·anio neng·nikanirangko chagrongna nangtokenga.
DSC-ni kamna ra·anio A·chik ku·sikkode Language Proficiency Test-o ra·jaengani a·selan Khasi Hills-o songdongkamgipa A·chik chadamberangde sorkarini kamrangko man·rikpajaenga ine janapatengon, Khasi Hills-ni DSC-o A·chik candidate-rangnaba apsan cholrangko on·na gita A·chikkukoba Language Proficiency Test-o ra·gatchina UAYF aro AKHNWA, a·dokni Chief Minister-ko mol·molataha.