TURA: A·chik Baptist Krima No. IV-ni ning·o donggipa A·chik Welfare Society (AWS)-ni Civil Service Coaching aro Training Centre-ko Sukrobar salo, a·dokni Chief Minister Conrad K Sangma, Tura-ni District Auditorium-o nokdonggae on·angaha.
Ia coaching centre-ko nokdonggae on·anio, Meghalaya Legislative Assembly-ni Speaker Thomas A Sangma, West Garo Hills a·jani Deputy Commissioner Vibhor Aggarwal, GHADC-ni Chief Executive Membor Albinush Marak aro Krima VI-ni dilgiparangba dongpae bak ra·angtokaha.
Ia Civil Service Coaching aro Training Centre-ko nokdonggae on·anganio a·dokni Chief Minister, jinmana aganprakangengon, chadamberangan a·dokni dal·batsranggipa bil aro cholrang ong·ani gimin iandakgipa coaching centre-rangko kulianiara, a·doknan namgniko ra·baani ong·a ine parakangaha.
Meghalaya a·doko songdongenggiparangoni 50 percent-mangni gitade bilsi 20-na komigiparangan ong·ani gimin chadamberangko nama ramao dilna nanga ineba ua aganaha.
Chatro chatrirangna agan-ku·pattianirangko on·angskaengon, civil service porikkarango chu·sokgipa ong·aniara ong·na amgijani ong·ja indiba ian an·tangtango bebera·ani, bimchipani aro namgipa dakbewalrangko nanga ine Chief Minister aganaha.
An·tangtangni chu·sokanirangnasan rikaigija, an·tangtangni songsalna on·pilskana nangani giminba Chief Minister, ia tom·anio aganangaha.
Ia tom·anio Meghalaya Assembly-ni Speaker Thomas A Sangma-ba jinmana aganprakengon, chadamberangni namgnina ia coaching centre-ko kulie on·ahani gimin AWS-ko mittelpilangaha.