TURA: Garo Hills Autonomous District Council (GHADC) aro dingtang dingtang kamrangni bidingo chanchirimna gita Sukrobar salo, a·dokni Chief Minister Conrad K Sangma, dingtang dingtang songni Nokmarang aro dingtang dingtang dolrang baksa tom·aniko ong·atangaha.
Nokmarangko Garo Students Union (GSU)-ni president Tengsak G Momin, ia tom·aniona dilbaaha.
Ia tom·aniko ong·atanio a·dokni Chief Minister, jinmana aganprakengon, Garo Hills-o nangchongmotgipa kamrangni gimin, mongsongbate GHADC-o ong·enggipa obostarangni gimin chanchirimna gita ia tom·aniona re·bae bak ra·eahani gimin Garo Hills-ni Nokmarangko aro dingtang dingtang dolrangko mittelpilangaha.
GHADC-o ru·uta bilsirangonin tangka paisani gita neng·nikanirangko chagrongna nangengani gimin ia neng·nikaniko namatchipgija donaigenchimode ja·mano namjabata obostaona soknaba gnang ineba Chief Minister aganaha.
“Re·anggipa bilsio GHADC-ni kajina gile man·aniara gong kror 25-mangsan ong·aia aro kam ka·giparangna dormahako on·na gita komibeoba gong kror 70-mangko nangengani gimin bang·en tangka paisarang chu·ongjaenga. Iani giminsa a·dok sorkari, GHADC-o tangka paisa koros ka·anirangko namdapatna aro tangka paisani gita mangrakbatatna ja·kuko de·chakataha,” ine Sangma aganaha.
GHADC-ko chalaiani aro GHADC-ni kamrangode a·dok sorkari maming dakeba bil man·ja ineba Chief Minister, gisik ra·atpiltaianiko on·angaha.
“2025 bilsini November 1 tarik dipet GHADC-o kam ka·giparangna dormaharangko on·na ja·ku de·anide, GHADC-o kam ka·enggiparangni namgnina ja·ku de·anisan ong·aia aro ian district council-o tangka paisani gita kim·kim ong·aniko ra·banasa ong·enga,” ine ua aganaha.
District council-ko chalaianio, Service Rules, Procurement Policy, Rationalisation aro uandakgipa kamrangko namdapatna gitaba sorkari, ia ja·kuko de·aha ineba Chief Minister parakataha.
 |
|