TURA: Salantini Janera songbadni bilsi 25 gapaniko da·al August-ni 30 tarik Sonibar salo, Tura-ni Hotel Orchid Polo-o manienga aro ia manianio, Meghalaya a·dokni Skotong Minister Conrad K Sangma, mongsonggipa sokgipa ong·e bak ra·anggen. Ia tom·aniko ong·atanio, Opposition dolni dilgipa Dr Mukul Sangma aro Tura-ni MP Saleng Sangma, Guest of Honour ong·e bak ra·angskagen.
Ia manianio, Garo Hills-o lekka porako on·na gita on·kange kam ka·anina nambatgipa dam 16 skulrangna mande ra·pilskaaniko dakanggen aro ia skulrangara, Christian Girls HS School, Dalu Bengali High School, Gorkha High School, Bengali Boys’ LP School, Tura Hindi High School, Tura Town HS School, Jawaharlal Nehru HS School, St Thomas High School, Don Bosco College, Tura Government College, Durama College, Sherwood Secondary School, Rongrenggre Govt HS School, Tikrikilla HS School, Mahendraganj Secondary School aro Rajabala HS School ong·a.
Ia manianio, MBOSE SSLC porikkao Garo subject-ko see, bang·bate mark man·gipa chatro chatrirangna dingtangmancha Annual Lindrid Shira Memorial Award-koba a·bachengatangjolgen.
Program-ara indake ong·enga, chong·motan skanggipao VIP-rangko rimchaksogen, uni ja·man VIP-rang chakkiko so·gen, Durama College-ni chatro chatrirang rimchaksoani gitko ring·gen, rimchaksoani kattarangko Salantini Janera-ni Publisher Shobha Chaudhuri agangen, ‘Idea of Janera’-ko Manas Chaudhuri agan-talate on·gen, seokgimin skulrangna mande ra·pilskaaniko dakgen, Tura-ni MP Saleng A Sangma aganprakgen, Opposition dolni dilgipa Dr Mukul Sangma aganprakgen, Skotong Minister Conrad K Sangma aganprakgen, mittelpilani kattarangko Salantini Janera-ni Senior Sub-Editor Warmand R Sangma agananggen aro bon·kamao Jubilee cake-ko VIP-rangni jakchi ratgen.