SHILLONG: BJP, jean batanggimin bilsirangonin Meghalaya-o ge 2 seat-na agrede chena man·jaenga, re·baenggipa bilsirangode ge 25 seat-rangkon chena ka·donganiko aganaha.
Sonibar salo State Executive Meeting-ni ja·man kobor ra·timgiparang baksa agangrikmitingo Assam-ni MP Kamakhya Prasad Tasa, indine aganaha, “survey ka·ani aro party worker-rangni kam ka·anirangko niatgenchimode mikkangchi re·baenggipa bilsirango BJP, Meghalaya-o ge 25 seat-rangkon man·ani cholrang donga.
Beben, BJP-ni gimin manderangni gisiko ong·gija chanchianirang donga indiba ua chanchipanirangko ta·raken party worker-rang manderangni gisikoniko bon·atgen.
Batanggimin bilsirangoni BJP, Meghalaya-o uamangni ka·donga gita seat-rangko man·jaenga, ma·mongo batanggimin bilsi 10-onin bilo donge kam ka·genchimoba Meghalaya-ode ge2 seat-na bate man·a chu·sokkuja.
Indiba Assam, Manipur, Arunachal aro Tripura a·dokrangode BJP sorkariko rika, Meghalaya-ode voter-rang BJP-na vote pu·ona jaja jiji ong·kua.
Meghalaya-ode BJP, chu·gimik bilko man·a somoi nangkugen, apsan daken BJP, Assasm aro Tripura-oba sorkariko rikna gita ru·uta sal somoirangoni jotton ka·aha ine MP aganaha.
Iarangni gisepon BJP-ni koborna ku·wattimgipa M Kharkrang, iani bidingo mamingkon aganna jechakaha, indiba party worker-rang party-ko bilakatna raken kam ka·enga ine aganaha.
Uandake Meghalaya-o ma·mongni gimin scheme-rangnan NPP-ni rasongko ra·sekani gimin sing·aon MP indine aganaha, ‘NPP, rasongko ra·seke katgenchimoba ma·mong sorkari, scheme-rangko dontongjawa.
