SSLC-o Garo topper-rangna Lindrid Shira Memorial Award-ko a·bachengata
TURA: India a·song gimiko kingsamangmang salanti nakatenggipa A·chik songbad ‘Salantini Janera’ songbadni bilsi 25 gapaniko Sonibar salo, Tura-ni Najing Bazar-o donggipa Hotel Polo Orchid-o maniangaha aro ia salko manianio a·dokni Chief Minister Conrad K Sangma, mongsonggipa sokgipa ong·e, Opposition dolni dilgipa Mukul Sangma aro Tura-ni Lok Sabha MP Saleng A Sangma, ‘Guest of Honour’ ong·e bak ra·angskaaha.
Salantini Janera songbadni bilsi 25 gapaniko manianio, West Garo Hills a·jani Deputy Commissioner Vibhor Aggarwal, Superintendent of Police (SP) Abraham T Sangma, dingtang dingtang sorkari official-rang, dingtang dingtang skul aro college-ni skigiparang, aro dingtang dingtang dolni dilgiparangba bak ra·angtokaha.
Ia manianio, a·dokni Chief Minister Conrad K Sangma, mongsonggipa sokgipa ong·e, jinmana aganprakangengon, Garo Hills aro Meghalaya a·dokni manderangna, mongsongbate A·chik jatna dangdike on·anio bilsi 25 gapaha ine mittelpilaniko parakangaha.
Batanggimin bilsirango A·chikkuchi segipa dingtang dingtang songbadrang nakatgenchimoba, dingtang dingtang a·selrangchi tange rakkina man·tokjaha ine janapatengon, ia Salantini Janera songbadko chalaianioba dingtang dingtang ra·bianirang aro neng·nikanirangko chagrongna nangenggenchim indiba chakchikachi aro gisiko nange kamko ka·anichi da·alona kingking ia songbadko tange rakkina man·aha ine ia songbadko chalaienggipa Manas Chaudhuri aro uni jikgipa Shobha Chaudhuri-ko Chief Minister mittelpilangaha.
Bilsi 25-na ia songbadko tange rakkianiara ia songbadko chalaigipa aro kam ka·giparangni bilko mesokani ong·a ine janapatengon, manderangni ia songbado ka·dongna man·anian dal·batsranggipa bil ong·a ine Sangma aganaha.
Ku·tangko ra·dona aro mingsingatna nangani gimin janapatskaengon, “Meghalaya a·doko songdongenggipa manderang ong·e, an·ching pilakan a·doko jakkalgipa ku·sikrangko, mongsongbate Khasi, Garo aro Pnar ku·sikrangko ma·sie ra·na nanga aro iani giminsa a·dok sorkari, skulrango Khasi aro Garo ku·sikrangko ra·na nangtelgipa subject-rang ong·atna kam ka·enga,” ine Chief Minister parakataha.
Garo aro Khasi ku·sikrangko Eighth Schedule-o napatchina dabienggipani bidingo ma·mong sorkarini aganchakanina sengkuengon, ia dabianiko chu·sokatna gita a·doko songdongenggipa pilak manderangkon bakrime kam ka·china Chief Minister mol·molataha.
Media ba kobor on·timgiparangni dakna nanggni kamrangko talate on·angengon, badiaba somoirango kobor ra·timgipa aro on·timgiparang, sorkari baksa meligrikjagenchimoba pangnan nitimgiparang gita kakketkosa manderangna u·iatna nanga ine Chief Minister aganaha.
A·dokna dangdike on·anio ku·cholsan ong·na nangani gimin janapatengon, ia tom·anio ua (chief minister), Opposition dolni dilgipa Mukul Sangma aro Tura MP Saleng A Sangma-ni ia manianio apsan asonge bak ra·anian iako mesokani ong·a ine Conrad Sangma aganaha.
“Chinga sakgittaman dingtang dingtang party-oni ong·e kamrangko ka·ani bewalrang dingtangnaba gnang indiba chinga sakgittamni miksonganian, Garo Hills aro Meghalaya a·dokni manderangna dangdike on·anian ong·a,” ine Sangma aganaha.
Ia tom·anio Tura-ni MP Saleng A Sangma-ba jinmana aganprakengon, Salantini Janera songbadni bilsi 25 gapaniko manianio dongpae bak ra·na man·ahani gimin an·tangni kusi ong·aniko parakangenba, ia Salantini Janera songbadara manderangna koborko on·gipasan ong·aigija an·tangan kamko ka·gipa ong·a ine aganaha.
Ku·tangni gamchatgipa ong·ani gimin janapangengon, “An·ching ku·tangko aganna ba knana man·on, namen dingtanggipa kusiniko man·a,” ine Tura-ni MP, ia A·chik songbadko bilsi 25-na tange rakkiahani gimin mittelpilaniko parakangaha.
Ming 22 ku·sikrangko Indian Constitution-ni Eighth Schedule-o napatna gita segatahaoba A·chikkuko man·chape salgro salaramni bang·bata ku·sikrangkon nichanggalengkua ineba ua an·tangni suk ong·gijaniko parakataha.
Tribal jatrangba dingtang dingtang cholrangko man·pana gita IAS aro IPS gita dakgipa porikkarango joltangni ku·sikrangchi sena on·na nangenga ineba Tura MP aganaha.
A·chik ku·sik aro daka rikanirangko ripinge rakkianio songbad aro dingtang dingtang media-rangni daitorangkoba Sangma talate on·angaha.
Ia tom·anio Opposition dolni dilgipa Mukul Sangma-ba aganprakengon, Salantini Janera-ko chalaianio dingtang dingtang neng·nikani aro ra·bianirangko chagrongna nanggenchimoba ia songbadko bilsi 25-na tange rakkina man·aha ine mittelpilaniko parakangaha.
Sorkarini kamrangosan ong·aigija pilak kamrangon kakket ong·aniko ra·bana man·na gita kobor on·timgipa aro ra·timgiparangan a·songna mongsonggipa gam gita ong·a ineba ua aganaha.
Salantini Janera-ko Garo Hills-ni manderangna nangchongmotgipa ine janapatengon, ian Garo Hills-ni manderangko mikrakatna aro an·tangtangni bilrangko ma·sina dakchake on·enggipa gita ong·a ine Sangma aganaha.
Ia manianio, Shillong Times-ni nokgipa Manas Chaudhuri, ‘Janera’-ni bidingo talataniko on·angengon, ia songbadni bilsi 25 gapaniko manianiara minggni kamrangna gisik ra·ani ong·enga aro uan skanggipade Salantini Janera songbadni skanggipa A·chik songbad ong·e bilsi 25 gapani aro gnigipade ia tom·anio, Chief Minister, Opposition dolni dilgipa aro Tura MP-ni apsan bak ra·anian ong·aha ine parakataha.
Salantini Janera songbadko 1990 bilsirango antiprako nakatgipa songbad dake ong·katatchengaha ine parakatengon, ia songbadko kulianio gitcham journalist Sanjay Sharma aro Tura Government College-ni gitcham Principal Lindrid D Shira sakgnian mongsonggiparang ong·a ine Chaudhuri aganaha.
Ia Salantini Janera songbadko a·bachengatmiting somoirango dingtang dingtang neng·nikanirangko chagrongna nangahaoba ia songbadko 2000 bilsionide salantian nakatna man·aha ineba ua parakataha.
Ia Salantini Janera songbado da·o page kingbrikode colour-chi ong·katatna man·engaha ine janapatskaengon, ia bilsini gisepo ia songbadni page gimikkon colour-chi ong·katatna miksongenga ine Chaudhuri parakakataha.
Re·baenggipa bilsionide bilsiantian, SSLC porikkani Garo subject-o mark bang·bate man·gipa chatro chatrirangna Annual Lindrid Shira Memorial Award-ko on·gnok ineba ia tom·anio Chaudhuri parakataha.
Ia manianio, Garo Hills-o lekka porako on·na gita on·kange kam ka·anina nambatgipa dam 16 skulrangna mande ra·pilskaaniko dakangaha aro ia skulrangara, Christian Girls HS School, Dalu Bengali High School, Gorkha High School, Bengali Boys’ LP School, Tura Hindi High School, Tura Town HS School, Jawaharlal Nehru HS School, St Thomas High School, Don Bosco College, Tura Government College, Durama College, Sherwood Secondary School, Rongrenggre Govt HS School, Tikrikilla HS School, Mahendraganj Secondary School aro Rajabala HS School ong·a.