SHILLONG: Meghalaya a·doko ge·e-game cha-giparangna nambata janggi tangani cholko on·na gita a·dokni a·briarigipa biaprango Cocoa ‘Brown Gold’ baksana Cashewnut ko bagan dake cha·nagita a·doko ge·e-game cha·ani bidingo namdapatenggipa departmentrang chan-chisamsoaniko dakangenga.
Batanggimin August jani 20-21 tariko Assam Agricultural University, Jorhat-o Directorate of Cashewnut and Cocoa Development (DCCD), Kochi ni ong·atanggipa National Cocoa and Cashewnut Conclave 2025 janapgimin minggni biterangko bgan dake janggi tangani cholko namdapatna mangsonge Cashew aro Cocoa ko ge·anio dakna nanganiko, uani chararangko simsake nirokna nangani, nisiatgipa jo·ongrangko chel·chakani, aro gipin ja·rikna nanganirangko skie on·aniko Conclave-o jinmana parakangaha.
Ia Conclave ong·atgipao Mizoram Agriculture Minister P.C Vanlalruata, programko a·bachengate on·angenba ia minggni biterang songo-noko donggipa manderangna baditana dakchakaniko on·na man·a uko janapangaha. Indake ia program Meghalaya a·dokna Meghalaya State Farm and Agricultural Corporation, Plantation Crops Division, aro Soil & Water Conservation Department ni Officialrang bakko ra·angtokaha. Ia program-o Dr. Femina (DCCD) aro Dr. Suma B. (Cocoa Research Centre) ia minggni biterangko ge·a gamanio dakna nanganirangko u·iatangengon chararangko simsakna nanganiko janapangen dingtang dingtang a·sal gnanggiparangko ge·na nanganiko u·iatangaha. Una agreba ia Conclave ni bako Cocoa aro Cashewnut ko gipin bolam-bolterang baksa ge·brinachi maming neng·nikaniko chagrongna nanggija bite ba bitchil oniko cha·ani bimangona ong·atna man·ani giminba skie on·aniko dakangjolaha.
Una agreba India a·songo man·enggipa Cocoa aro Cashewnut biterangko badingchiwale man·ani ia chasongo tang·doaniko nikna man·e a·dokni a·briarigipa biaprango ia biteko man·gipa bolrangni tangna man·aniko nike Cashewnut aro Cocoa ba ‘Brown Gold’ ko bari-bagan dakanichi ge·e-game cha·giparangni janggi tangani ko namdapatna dakchakanggen.
