Mendipathar Handloom institute-ko nirokatchina CM-ko MPYC mol·mola

TURA:Mendipathar-o Meghalaya Handloom Training Institute-ko tarie on·piltaichina aro tangchapilataina nangnike Chief Minister Pa. Conrad Sangma-ko MPYC-ni President Timjim Momin mol·molangaha.
“Ia institute, skill development-na nambatgipa ong·e dilengasan ba niksenggipasan ong·iaja indiba an·ching jatni dakbewalo bara dokanio tarigiparangna mingsinggipa ong·enga jeon Khasi, Garo aro Jaintia communty-rangni jatni dakbewalko ma·sianga. Meghalaya-ni traditional handloom product-rangara, Dakmanda aro Ganna of the Garos, Ri-Bhoi-ni Eri shawl-rang, aro Jainsem aro Khasi-rangni Dhara ganani chinanirangko  bara dokgiparang ong·a. Iarangan an·ching manderangni heritage, mikkim rasong aro an·tangtang dake cha·ani chinrang ong·enga,” ine Momin aganaha.
Jatni ganani chinaniko ripinganio Mendipathar Institute changsao mongsonggipa bako kam ka·agipa ong·achim, aro unbaksana chasong gitalni bara dokani technique-rang baksa chadamberang aro me·chikmarangma skie on·angaha. Administration-ko tangchapiltana nangchongmotani ong·ja indiba Meghalaya-na cultural aro economic janggi tangani cholkoba nanga ine Momin aganaha.
Momin-ni aganangani gitade, changsao gam-chatgipa chol 2014 bilsioni galchipgipako ta·rake taripilna nangengan baksa bilakgipa rika cho·aniko nangenga. Institute campus-ni sima arirang jeon a·a bigha 75 donga uni sima arirango pakmarangko ka·nang nangenga aro maming permission ra·gija a·arangko ra·sekbaenga iarangni bidingo Momin mol·molangaha.
Gazetted Post Instructor-rang, Research Officer, Weaving Demonstrator-rang, UDA, Librarian, Jugali-rang, Cook aro Chowkidhar-ni biaprango gapatchina Momin dabiangaha.
Iako name dake chalaina man·janichi neng·nikanirang joltangni community-na sokbaenga jekai kam ka·e cha·na man·ja, chadamberang gipinrangchina re·anga, jatni bara dokanirango gisiko nanganirang komianga, songsalna neng·nikatan baksana tangka paisarangni gita neng·nikaniko man·anio jaksi ote mesokangaha, Garo Hills-ni chadamberangna aro handloom sector-ni dal·begipa namgnio chol donganiko tangchapilatchina Chief Minister Conrad Sangma-ni ta·rake nirokataniko nangnike Momin mol·molangaha.