TURA: Williamnagar-oni A·chik Dedicated Integrity Leaders (ADIL), South Garo Hills district-ni Chokpot C&RD Block-ni ning·o Chokpotgre songo MGNREGA project on·gipako matchotatjani bidingo sing·doaniko dakangaha aro iani bidingo authority-rang niatja ong·ode ja·ku de·angna mikrakataha.
ADIL-ni parakatani gitade, 2022-23 financial year-ni somoio MGNREGA Job Card scheme-ni ning·o km 1 CC (cement concrete) ramako tarina tangka paisako chamatgipa project-ni bidingo matchotkujaenganina sing·doangaha. Iani bidingo Chokpotgre songni Village Employment Council (VEC) membor-rangni gita matnange segipa lekkako on·angaha, rama tarigipao 344 metre-mangmangkosan matchotaha je bak bangki dongkuenggipa 656 metre rama tarina nanggipakode galchipaha aro matchoatatjaha.
“Right to Information (RTI) dorgastoko gapatan baksa VEC membor-rangni gita changni chang jotton ka·genchimoba aro Block Development Officer (BDO)-ona aro Assistant Programme Officer (APO)-na matnange lekkarangko see on·genchimoba maming ja·ku de·aniko nikjaha.
Project-ko matchotatna ba taripiltaina maming ja·ku de·aniko ba aganchakangna authority-ni gita chu·sokjaenga, a·dokni community-ko sinjetanio aro galchipe donenga,” ine uamanga aganangaha. Songni manderangni gita iani bidingo matnange dorgasto segatangani ja·man Central Executive Body, matchotgijagipa project-ko nina biapona re·bae nieaha jeon VEC-ni matnangatgipa kakket ong·a ine ma·siangna man·aha. “Rama taria matchotja aro chamgipa kamko dongale galchipaha, ian executive of rural development scheme-rango kakket ong·ani aro nikjoke kam ka·ani bidingo namen sing·doangna nangani ga·akenga. Chinga ADIL dilgiparang, iani bidingo namgipa ja·kuko ta·rake de·china kam ka·na nanggipa officer-rang aro bak nanggipa department-ko mol·molanga aro ia noticena tarik on·gipaoni jasani gisepo rama tarina nanggipa dongkuenggipako matchotatchina,” ine uamang mikrakataha. Rika cho·ani project-ko nangchongmotgipa ong·ja indiba ian manderangni namgni, songadamrangona ramarangko tariangani aro chamatgipa tangka paisarangko kakketgipa ramao jakkalani bidingo ong·a, uamang knachakja ong·ode niam baksa officialrang aro department-rangni kosako ja·ku de·na ka·mikenataniko on·angaha.
