SHILLONG: A·dokni Congress, Autonomous District Council (ADC)-rangna a·dok sorkarini tangka-paisani dakchakna de·e ra·baaniko ian niam-retini gita ong·ja aro political-ni gita chanchie daka kamsa ine rake matnangaha.
MPCC Secretary Manuel Badwar, kobor ra·timgiparangna aganao Constitution-ni Sixth Schedule-ni ning·o district council-rangna on·gimin autonomy-ni miksong-chanchiani niamrangko ning·o dona ja·ku de·ani ong·a ine aganaha.
“Niam-bidikni gita na·simang iako dakna miksongja. District council autonomous ong·telaia aro autonomous-on ong·angaikugen. Chief minister, dakchakna aganani kattanasan ong·aia. Anga simsakenga ine a·gilsakna mesokna dakaigipa ong·a indiba namen gualaniko dakaha. GHADC-ko gale dona gita dakangkugen,” Badwar aganaha.
Ong·nasienggipa Garo Hills Autonomous District Council (GHADC) election-rang ong·na skang manderangko tolpinikna chanchiako ua champengaha. “GHADC election-rang re·baenga je manderangan politics kal·ako ma·sigijagipa mitam manderangna ua re·bae dakchakgen aro niatgen ine agane ua iako daknaba, aro politics-o manderangko ga·atnaba donga. An·ching maina iani gimin duk man·gen? District council maiaba donga jeon ia gita dakna man·jawa,” ua jera ra·aha. District council-rang chu·onggijanina aro councilko rikanio neng·nikanina an·tangtangan krengenga. District council adita somaina gualaniko dakaha, uni gimin jechakja anga ka·donga council-o namen chu·onga, namen komia. Niamo pangchake council bang·a kamrangko dakna man·a indiba jemangan bilsoka ba uako dakna chu·onga gita gadang donga kam ka·na sikgipa memborrang dongja indake neng·nikaniko man·enga,” ua aganaha. ADC-rangni ning·o neng·nikanirangko ma·sigenchimoba sorkarini dakchakna de·e mesokani aganchakani ong·ja ine Congress dilgipa aganaha. Changsa dakchakna agane, dakchakna jotton ka·ani dakchaka ong·ja, chief minister jeko dakenga uan namen gualbeani ong·a. Sixth Schedule-ni ning·o an·chingni a·jatango sason ka·na chinga bil donga,” ua aganaha.
Council-ko rikana bate political-ni gita miksonganisan, man·gnisan ong·aia, Badwar matnange aganaha.
