TURA: West Garo Hills Tura District Auditorium-o Associated Board of the Royal Schools of Music (ABRSM) Guitar Workshop and Concert ong·atanggipao a·dokni skotong Minister Conrad K Sangma Sonibar anttamo bak ra·anga. a·dokni chadamberangna doka dam·ani aro ring·salanirangko ra·dona a·dok sorkari dak-chakanirangko on·enga ine Sangma jinmana aganangaha. Batanggimin bilsirangko niatpile aganangskaengon uni dambemitingo salrango doka dam·ani aro ring·salanina gisiko nanggipa chadamberangna sorkarini gita ua somairang dakchakanirang dongja ineba ua aganaha. Doka dam·anina aro ring·salanina changgipa sapgipa aro gisik nanggipa chadamberangna Meghalaya Grassroots Music Project (MGMP)-ni gita dakchakanirangko on·enga. Batanggimin bilsioba a·doko gimiko sak 7,500 artist-rangna crore 35 tangka paisarangko a·dok sorkari jakalangaha ineba Chief Minister u·iatangaha. Chadamberangna iandakgipa cholrangko on·enganichi dingtanganiko nikengani gimin aganangskaengon, Tura ni chadamberangni doka dam·ani aro ring·-salanirangna changa sapanio dingtanganiko nikenga aro a·dokni dakbewal rikbewalrango namroroaniko nikna man·enga ineba ua aganangaha. Ian tangka paisako on·e dakchakengsan ong·ja indiba ian doka dam·aniko skie ra·anikoba an·ching rikna nangenga, doka dam·ani aro ring·salanina chu·onga gita nanggipa bosturangko on·anichi a·dokni chadamberangni changa sapaniko ra·dona man·gen ineba Sangma aganangaha.
