SHILLONG: Lekka pora donggipa mitam chadamberang, bobil dolrango napangahani gimin Meghalaya a·doko bobil dake chakatgipa dolrang ong·kattaiani cholrang donga ine mikrakatanirangko man·ahani gimin iandake mikrakatanirangko namrenge ra·jachina aro ning·tubate am·sandichina gita Congress dol, a·dok sorkariko didiataha.
Bangladesh a·songo so·sojengjeng ong·engani a·selsa Meghalaya a·doko ong·gija dakgipa manderangko nikna man·enga adita salrangna skang, a·dokni Chief Minister Conrad K Sangma-ni agananiko jegalatengon, a·doko bobil dake chakatgipa dolrang ong·kattaina sienga ine mikrakataniara mamingna baten simsakna nanggipa kam ong·a ine Meghalaya Pradesh Congress Committee (MPCC)-ni secretary Manuel Badwar parakataha.
Iandake mikrakatanirangko name am·sandigija dongenchimode a·dokna kenchakna nanganiko ra·banaba gnang ineba ua aganaha.
“Songsalko namdapatna nangenga ong·ode songsalo iandakgipa mikrakatanirangko name am·sandina nanggen. Iandake mikrakatanirangko namrenge dongaigenchimode aro iako maming kenna nanggijagipasa ine dongaiode anga chanchia, ian a·dok gimikna namen kenchakna nangani ong·enga,” ine MPCC-ni secretary aganaha.
A·doko chadamberangni iandake suk ong·nikjae bobil dolrango napangani a·selara lekka porani, kamrangko ka·e cha·ani, manderangni janggi tangani gadangko namdapatani aro bading chiwalani cholrang dongjani a·selan ong·a ine Badwar parakataha.
“An·ching pilakni gitan bilgrikuengani gimin politician-rang, ja·mano obosta namjabataona senggija, iani bidingo gisik nangbatna nangengaha,” ine ua aganaha.
Bobil dolrango gital membor-rangko rimnapenga ine agananiko a·dokni DGP Idashisha-ni ra·chakani gimin janapatskaengon, “Uni ku·rachakaniara namen namchongmotaha maina ian bang·a dilgiparangnan mikrakatani ong·aha. Angni chanchiani gitade an·ching songsalni gitaba iako name nina nangenga aro ia daitoko politician-rangan ra·batna nanga,” ine MPCC-ni secretary aganaha.
A·doko skia man·gipa adita chadamberang, bobil dolrango napangaha aro skie ra·aniko matchotahani gimin a·doko bobil dake chakatgipa dolrang ong·katbataenga ine adita salrangna skangsan Opposition dolni dilgipa Mukul Sangma, mikrakataniko on·angahachim.
Sangma-ni iandake mikrakataniko on·angani ja·man a·dokni DGP Idashisha Nongrang-ba iako ku·rachake, chadamberangko bobil dolrango rimnapenga ine an·tangni kobor man·soaniko parakataha
“Oe, gital bobil dolko bikottaina gita chadamberangko rimnapenga ine chinga koborrangkode man·soenga indiba badia dolni manderang, badia chadamberangko rimnapna jotton ka·enga, ukosa chinga ma·sikuja,” ine a·dokni Director General of Police (DGP) Idashisha Nongrang parakataha.
Da·o dipet a·doko bobil dolrangko bikottaina jotton ka·enga ine kobor man·enggipani bidingo tale ma·sikujaengoba police-rang, mikrake kamrangko ka·enga ineba ua aganaha.