TURA: West Garo Hills a·jani Bhaitbari Higher Secondary School-na skigipako ra·anio a·dokni Reservation Policy-ko ja·rikja ine West Garo Hills Bharatiya Janata Party (BJP)-ni general secretary Peterjob A Sangma matnangatenba, ia skulo skigipani kamna gital dake advertisement-ko on·piltaichina Education department-ko didiataha.
Sangma-ni parakatani gitade, Bhaitbari Higher Secondary School-o skigipani kamna re·anggipa 2023 bilsini September 4 tariko, dingtangmancha advertisement-ko songbadrango on·ahachim indiba ia kamna ra·anio Reservation Policy-ko ja·rikgijasa skigipako ra·ahachim.
“Ia skulo assistant teacher-ni kamna ra·anio reservation policy-ko ja·rikgija, tangka paisa on·giparangkosa ra·aha ine chinga koborko man·soaha aro iani a·selan kamko ka·na nanggipa candidate-rang man·gija tangka paisa on·na man·gipa candidate-rangsa kamko man·skaaha,” ine West Garo Hills BJP-ni general secretary parakataha.
Ia skulo skigipani kamna gital dake advertisement-ko on·piltaichina aro Reservation Policy-o pangchakesa skigipako seokchina gitaba Sangma didiataha.