SHILLONG: Shillong Medical College-ni 2025-2026 academic year-na National Medical Commission (NMC), dam 50 MBBS seat-rangko ra·chakaha aro ian Meghalaya a·doko medical-ko poraigiparangna mingsa mongsonggipa ja·ku de·chakatani ong·aha.
Shillong Medical College-na NMC-ni gita MBBS seat-rangko on·ahani gimin ia college-ba dam 13 a·dokrango donggipa dam 21 medical college-rangoni damsa ong·paaha.
Iani bidingo kobor ra·timgiparangna u·iatengon, Shillong Medical College-na dam 50 MBBS seat-rangko NMC-ni on·aniara a·dokna mingsa mongsonggipa kamo chu·sokaniba ong·aha ine a·dokni Health Minister Ampareen Lyngdoh parakataha.
Ia bilsini a·bachengachibara a·dok sorkari, ia medical college-ni kamrangko nirokna gita Shillong Medical College Council-ko songe on·ahachim.
Ia council-ko Dean aro sak 14 membor-rangni dilanichi bikotaha aro ia council-ni kamara, medical college-ko NMC-ni dongimin niamrango pangchake, dingtang dingtang kamrango nirokanian ong·achim.
Ia council baksana, sorkarini medical aro nursing institute-rango poraigipa chatro chatrirangna fee-rangko tarina gita Health & Family Welfare Department-ni ning·o dingtangmancha Fees Committee-koba sorkari songe on·aha.
Iana agreba, medical college-rango poraienggipa chatro chatrirangni namgnina a·dok sorkari, Anti-Ragging Committee, Gender Harrassment Committee, Pharmacovigilance Committee aro uandakgipa gipin committee-rangkoba songe on·aha.
Shillong Medical College-na dam 50 MBBS seat-rangko NMC ra·chakmanahani gimin da·o ia medical college-ko dongimin niamrango pangchake kulina man·gnok.