TURA: Tura Christian College-ni Graduation Day-ko Mongolbar salo, Tura-ni District Auditorium-o ong·atangaha aro ia program-ko ong·atanio, a·dokni Director General of Police (DGP) Idashisha Nongrang, mongsonggipa sokgipa ong·e bak ra·angaha.
Ia Graduation Day-ko ong·atanio, Tura Christian College-ni Principal Earlitha M Sangma, dingtang dingtang department-ni official-rang, college-ni skigiparang, chatro chatrirang aro ma·a paarangba bak ra·angtokaha.
Ia Graduation Day-ko ong·atanio, Tura Christian College-o poraie graduate ong·anggipa chatro chatrirangna mande ra·pilskaanirangko dakangan baksana certificate-rangkoba suale on·angjolaha.
Ia program-ko Tura Baptist Mondolini Assistant Pamong Rev Nicky N Sangma-chi Isolo bi·e a·bachengataha aro rimchaksoani kattarangko Tura Christian College-ni President Dr Tony Travert C Marak aganangskaaha.
Ia college-ni Graduation Day-ko ong·atanio a·dokni DGP, jinmana aganprakangengon, Tura Christian College-o poraie graduate ong·anggipa chatro chatrirangna an·tangni namgipa skaniko on·angenba, mikkangchi songsalna dangdike on·giparang ong·china chatro chatrirangko didiangaha.
Lekka porani gamchatgipa ong·ani gimin aganangengon, “Bida budiko man·anian bilakbatsranggipa silchidare gita ong·a aro ian a·gilsakko dingtangatna man·gipaba ong·a. Songsalo namroro silroroaniko ra·baaniara an·ching sakantini jakon ong·a,” ine Nongrang aganaha.
Ia tom·anio, Tura Christian College-ni Vice Principal Biman Tesil R Sangma, mittelpilani kattarangko aganangskaengon, ia program-ko chu·sokgipa ong·atna man·ahani gimin, a·dokni DGP, college-ni principal, dingtang dingtang official-rang, skigiparang aro chatro chatrirangkoba mittelpilangaha.
Ia college-ni Graduation Day-ko ong·atanio, Harding Theological College Choir aro Tura Christian College-ni chatro chatrirang, ring·mittelanirangchi manderangko an·saoatangaha.