TURA: Dadenggre Civil Sub-Division office-o kam ka·giparang, kamrangko name ka·jaengani a·sel aro somoi gita asongjaengani a·sel dingtang dingtang nanga kamrangna re·anggipa manderang neng·nikanirangko chagrongna nangtokenga ine Budbar salo, GSU Western Zone (North) Dadenggre, AYWO Dadenggre aro ACHIK Dadenggre dolrang matnangataha.
GSU-WZN Dadenggre-ni president Tengsan M Marak-ni u·iatani gitade, Budbar salo ua, AYWO Dadenggre unit-ni president Sengjan Sangma aro ACHIK Dadenggre unit-ni president Kronosh Sangma baksa ia office-ona re·ange nion, office-o kam ka·giparang dongjani a·sel dingtang dingtang kamrang, jekai income certificate, birth certificate, caste certificate aro uandakgipa lekkarangko tarina re·anggipa manderangni office-o senge dongna nangako nikeaha.
“Manderangni nangchongmotgipa lekkarangko tarianio neng·nikanirangko man·tokenga ine changni chang badi ka·anirangko man·soahani gimin chinga Dadenggre SDO-ni office-ona re·ange nion, office-o kam ka·giparangko office-o nikejaha aro iani a·selan nangchongmotgipa lekkarangko tarina senge dongenggipa manderangni neng·nikanirangko chinga nikna man·aha. Budbar salara antini sal ong·ani gimin dingtang dingtang songrangoni manderangba ia salon, an·tangtangni nangchongmotgipa certificate-rangko tarijolna office-ona re·batokahachim indiba kam ka·giparang dongjani a·sel neng·nikanirangko chagrongna nangtokaha,” ine Marak parakataha.
Dadenggre Civil Sub-Division-ara Meghalaya a·doko gitchambatsranggipa sub-division ong·ani gimin manderangna dangdike on·anio kamrang olgrokna gita nangjachim ine janapatengon, Dadenggre SDO office-o kam ka·giparangni office re·aniko aro kam ka·anirangko nambate nirokjringchina Dadenggre-ni GSU, AYWO aro ACHIK dolrang, chubata gadango donggipa official-rangko didiataha.