Bristibar salo dingtang dingtang dolrang jinma re·jomaniko ong·atenga
TURA: Garo Hills Autonomous District Council (GHADC)-o kam ka·enggiparang, ja 44-ni dormaharangko man·kujaengani gimin kamrangko dontongate jingjengatengon, kam ka·giparangna jabongani dormahako on·na tik ka·aniko Non-Gazetted Employees Association (NGEA) jegalataha.
NGEA-ni president Brithen M Sangma-ni parakatani gitade, GHADC-o kam ka·giparangna jabonganiko dormaharangko on·chengna gita Mongolbar salo, GHADC-ni secretary seachi u·iatahachim indiba ia jabongani dormahako uamang ra·chakna jechaktokaha.
Indita jarangni dormaharangko man·kujaengani gimin GHADC-o kam ka·giparang, re·anggipa July 7 tarikonin kamrangko dontongate jingjengatna a·bachengahachim aro jingjengataniko a·bachengmiting somoiode uamang, bilsisani dormahakosan on·chengchina dabiaiahachim. Indake ong·genchimoba, kam ka·giparangni dabianirangna GHADC-ni Executive Committee aro a·dok sorkari, nachil songjahani gimin aro maming ku·rachakanirangko on·jahani gimin da·o uamangni man·na nangkuenggipa chu·gimik ja 44-ni dormaharangko on·china dabiskaengahachim.
“Chinga jabongani dormahako ra·chakjawa aro chingna chu·gimik ja 44-ni dormaharangko on·kujaskalde chingni jingjengataniko dontongjawa,” ine NGEA-ni president parakataha.
GHADC-o kam ka·giparangni jingjengatanio Opposition MDC-rang aro dingtang dingtang civil society organization (CSO)-rang, jekai GSU, AHAM, ACHIK, AAYF, GSU NEHU CELL, ANYO, NGCO, APA, FKJGP, ADE, AYWO, FAF, ACHIK aro uandakgipa dingtang dingtang dolrangba bakrimaniko on·enga.
Indake ong·engon, GHADC-o kam ka·enggiparangna uamangni man·na nangkuenggipa dormaharangko on·china dabie aro Tura Medical College-ko Public-Private Partnership (PPP) mode-o chalaina sorkarini tik ka·aniko jegale Bristibar salo, Garo Hills-ni dingtang dingtang CSO-rang, pring 10:30 bajioni attam 2:00 bajiona jinma tom·bimonge re·jomaniko ong·atenga ine u·iataha.