Opposition dolrang ‘politics kal·enga’ ine matnanga
SHILLONG: Garo Hills Autonomous District Council (GHADC)-o kam ka·enggipa manderang, ja 44-ni dormaharangko man·kujaengani gimin kamrangko dontongate jingjengatanirangko dakengon, ia cholko ra·enba BJP, TMC aro gipin opposition dolrang ‘politics kal·na’ jotton ka·skaenga ine a·dokni Cabinet Minister Rakkam A Sangma matnangatenba, sorkarini on·enggipa cholrangko ra·chakchina GHADC-o kam ka·enggiparangko didiataha.
Sangma, jean Siju-Rongara constituency-ni NPP MLA-ba ong·a, opposition dolrangni politics kal·aniko knachakgija, sorkarini on·enggipa cholrangko ra·chakchina gita GHADC-o kam ka·enggiparangko mol·molataha.
GHADC-o ong·enggipa obostarangni gimin kobor ra·timgipa manderang baksa agangrikengon, GHADC-o kam ka·giparangni neng·nikanirangko ua ma·sichaka ine janapatenba, ua an·tangba uamangni biapo ong·genchimode jagittam ba jabrini dormaharangko man·jaon jingjengatanirangko dakaigen ine Sangma parakataha.
“Ja 44-na dormaha gri janggi tanganide namen neng·beani ong·a. Nokgipasa uamangni neng·nikanirangkode ma·siaignok,” ine Sangma aganaha.
“GHADC-o kam ka·enggiparang, ja 44-ni dormaharangko man·kujaengani giminsa jingjengatanirangko dakenga ine sorkari ma·sia aro iani giminsa a·dokni chief minister, November 1 tarik dipet GHADC-o kam ka·giparangna dormaharangko on·na parakataha. Kam ka·giparangni man·na nangkuenggipa dormaharangonikoba jabongani dormaharangko on·sochengna adita salrangna skangsan GHADC-ni Executive Committee parakataha. Bangki dormaharangkoba a·dok sorkarini arrear-rangoniko aro an·tangtangni tangka paisarangko on·na u·iatahachim,” ine Sangma aganenba, sorkarini on·enggipa cholrangko ra·chakchina kam ka·giparangko didiataha.
Sorkarini on·enggipa cholrangko ra·chakchina kam ka·giparangko mol·molatengon, “Angni adagipaba GHADC-o kam ka·gipaan ong·a aro uamangni nokdango chagrongna nangenggipa neng·nikanirangko angaba ma·sia,” ine Education Minister aganaha.
GHADC election sepangengahani giminsa BJP, TMC aro gipin Opposition dolrang, kam ka·giparangni jingjengatanio politics kal·na jotton ka·enga ine matnangatengon, “GHADC-o mitam dolrang politics kal·na jotton ka·enga aro ian namen kragijani ong·a. Iani bidingo mitam opposition dolrang, ding·chaoatanirangko ra·banasa jotton ka·enga aro kam ka·giparangni neng·nikanirangko namatani pal batesa uamangko jingjengatangkuna nangnikskaenga,” ine Sangma aganaha.