SHILLONG: White Ink Case ba batanggimin somoio ong·angagimin education scam-ni bidingo, matnangako man·gipa Ampareen Lyngdoh-ni kosako segatgimin case-ko Meghalaya High Court-ni bon·atani gimin, CBI-da·o Supreme Court-ona case-ko ra·angna chanchienga ong·ode ia mamlaniko gimin jeni kosakoba uaba dakgrikaigen ine Ampareen Lyngdoh aganaha.
Anga ia mamlarangni bidingo bang·e aganna gita sikjaha, maina anga ia mamlako ru·uta bilsirangna childame dongaha, una Meghalaya High Court-an kakket bichalko on·aha, indake High Court-an uni case-ko bon·atahani gimin mamingkoba chanchie rojawaha, ua aganaha.
“Saoba jekoba dakna chanchibo, sawa sko sae rogen. Jeba jekoba dakaichina ango maming sko saani dongja’’ ine kobor ra·timgiparangni sing·anina Lyngdoh aganchakaha.
Lyngdoh-ni aganani gitade, ua mamingdakeba duk man·jawa aro gipinrang jedake ong·a uandake uoba apsan bilan donga.
“Anga maikoba dakmanaha ong·ode, na·a an·tangko una taria, uandake angaba an·tangko tarienga. Angko sinjete dongenggipa matnangaoni angko jakgitel watahani gimin angko kusi ong·na on·pabo,” anga darangna kenja aro darangkoba mikkang nija ine Lyngdoh aganaha.
Cabinet Minister Ampareen Lyngdoh aro retired government official-rang JD Sangma aro Ameka Lyngdoh mangni kosako education scam-ni bidingo mamla segatgipako Meghalaya Hish Court meja Bristibar salo bon·atahachim.
Unomitingo Hynniewtrep Youth Council (HYC), sak 246 candidate-rangni gimin a·dok sorkarini aganchakaniko dabiskaenga, jemangkon niamgri rimnapaha ine uamangni appointment-rangko ra·galpilahachim.
