SHILLONG: Meghalaya Police Bike cha·uao jak donggipa sak 19 manderangko rim·aha uamangoni sak 10 Bangladesh-oni aro sakgni bilsi sokugijagipa ong·a. East Khasi Hills mongsongbate Shillong jolo Bike cha·uanirang batroroengani gimin uamangko am·sandina a·bachengatanio bilsi sokugijagipa sakgni baksa sak 17 dosi donggipa manderangko rim·aha ine East Khasi Hills Superintendent of Police Vivek Syiem Sukrobaro aganangaha.
Sak 19-oni sak 9-de West Jaintia Hills District-ni Barato, Dawki aro Jowai songrangoni ong·achim. Batanggimin Bristibaro Mawryngkneng Police, Scooty cha·ue katgipa Barato songoni Nehlang Lamare (24) aro Jowai Caroline-oni Klement Timung (18) sakgniko rim·na man·aha aro uamangni Scooty (ML 05 X 5909)-koba Mawryngkneng ramao gale donako man·aha.
East Khasi Hills Nongtalang Police-rangba cha·ugipa Bike-ko ra·chaksoenggipa sakgittamko rim·na man·aha uamangara Peter Pohrmen (18), Vicky Dhar (20) aro Romeo Ryngksai (24) uamang sakgittaman Dawki-oni ong·tokachim. SP-ni aganani gitade cha·ue palatgipako ra·chaksoenggipa Bangladesh-onikoba sing·sandie rim·aha ine aganangenba East Khasi Hills Police aro West Jaintia Hills Police baksa nangrime am·sandion Bike cha·uanio dosi donggipa sak 14 manderangko rim·dapna man·aha.
Uamangoni sak 10-de Bangladesh-oni ong·a aro sak 14-oni sakbri Deimiongjongmi Paslein (25), Barister Lamare (20) saksade bilsi 15-san ong·kuenggipa aro Last Born Lamare (21) ong·a aro uamang gimikan Barato songoni ong·toka. Cha·ugimin bike-rangko ra·chaksoenggipa sak 10 Bangladesh-ni manderangara, Kawsar Mia (40), Ali Hussain (40), Md Rafig Mia (28), MD Jul Miah (20), Monnan Miah (38), Ruymel Miah (20), Md Shabaj Mia (24), Ridial Hussan (19), Samiya Mia (25) aro saksade bilsi 17-san ong·kuengachim. Uamang gimikan Bangladesh-ni Sonamganj District, Sylheti District, Tangan District aro Hobiganj District-rangoni ong·a.
