SHILLONG: Meghalaya a·doko PMGSY project-rangna seokani aro kam ka·ani bewalrangko Sukrobar salo Opposition dolni dilgipa Mukul Sangma, Autumn Session-ni bon·kamgipa salo janapangenba, ia scheme-ni kamrangko name chu·sokatjaenga ine a·dok sorkariko matnangataha.
PMGSY-ni bangki kamrangko matchotchipkujaenga aro contractor-rangna tangka paisarangko ja·manchakesa gamengani gimin ia scheme-ni miksonganirangkon chu·sokatjaenga ine Sangma aganaha.
Sangma-ni aganani gitade, PMGSY project-rangna tangka paisani gita dakchakanirangko ra·na Meghalaya sorkarini World Bank baksa songgigrikanio soi ka·chengon, sanchakram biaprangona, skulrangona aro bazaar antirangona ramarangko tarichengna nangachim.
Salgro salaram a·dokrango Meghalaya a·dokan ia project-rangna World Bank baksa soi ka·chenggipa ong·achim ine janapatengon, iani miksonganian dingtang dingtang biaprangona ramarangko tarianichi manderangna janggi tangani cholrangko on·anian ong·achim ine Sangma aganaha.
Ramarang namjani a·selan an·o donggipa me·chikrang, somoi gita hospital-rangona sokna man·jae an·o donggipa me·chikrangni aro bi·sa bakgitchakrangni sianirang batroroenga ineba ua aganaha.
Garo Hills-ni bang·a biaprangon ramarang namjani a·sel neng·nikanirangko chagrongna nangtokenga aro tangka paisarangko man·engoba bang·a biaprangon bolni dolongrangkosa jakkalkuenga ineba Opposition dolni dilgipa aganaha.
A·kolrara dakgipa ramarangko re·na nangrongani a·selan ua an·tangba kang·kare saa namchipjaenga aro 2014 bilsio maikai a·arang be·dape, antignimangna NH-51 rama champengatako man·ahachim, iarangni giminba Sangma janapangaha.
Mendipathar railway station-ona dakanggipa ramarang a·kolrara dakani a·sel aro bolni dolongrang be·ani a·sel neng·nikanirangko chagrongna nangtokenga ine ia railway station-ona ramarangko nambate tarichinaba Opposition dolni dilgipa a·dok sorkariko didiangaha.
Garo Hills-o tourism-ko tang·doatna cholrang dongani gimin janapatskaengon, Garo Hills-o donggipa dingtang dingtang biaprangko sandie, ia biaprangko tourist-rangni rochakani biaprangko tarina nangenga ine Sangma aganaha.
Tura-oni Dadenggre-ona dakanggipa rama namen apchonbeani a·sel manderangna kenchakna nangani ong·enga ine janapatskaengon, ua an·tangba ia ramako changsade a·sel ong·aniko chagrongaha ine Sangma aganaha.
Mylliem-oni Mankachar-ona dakanggipa ramara bading chiwalani mongsonggipa rama ong·a ine ia ramarangko nambate tarina nangengani giminba Sangma, ku·pattianiko on·angaha.
