SHILLONG: Sukrobar salo Meghalaya Legislative Assembly-ni gital seoka man·gipa Deputy Speaker Limison D Sangma-ko dingtangmancha Sorkariko rikenggipa doloni Opposition doloni Surkobaro mandera·e rimchaksoaniko dakmitingo Voice of Peoples Party (VPP)-ni MLA sakbri- Nongkrem MLA Ardent Miller Basaiawmoit, Mawlai MLA Brightstarwell Marbaniang, Mawryngkneng MLA Heavingstone Kharpran aro North Shillong MLA Adelbert Nongrum mangde bakrimjaha.
Iana agreba Sukrobar salo Assembly-o 2025-26 bilsina ming 28 on·dapgipa budget-ni bidingo chanchirimanioba VPP doloni darangba iani bidingo jera ra·aniko dakangjaha jenan TMC dolonisa ming 28 on·dapna mangsongenggipa budget-ni bidingo sing·doaiaha.
Indake a·dokni gitalgipa Deputy Speaker-ko mandera·ani somoio aro on·dapnasienggipa budget-ni bidingo jera ra·grikgija VPP dolni jrip donganian Asembly-o Opposition dol ong·e an·tangtangni daito-oni janggilate kataniko nikna man·a.
