SHILLONG: Meghalaya Legislative Assembly-ni gital Deputy Speaker-ko seokna election-ko ong·atanio Opposition dolrangoni susagipa dongjahani gimin Sukrobar salo, National People’s Party (NPP)-ni candidate aro Raksamgre-ni MLA Limison D Sangma-ko Assembly-ni gital Deputy Speaker-na seokaha.
Iani bidingo, Assembly-ni Speaker Thomas A Sangma, Autumn Session-ni somoio jinmana parakataha.
Meghalaya Assembly-ni gitcham Deputy Speaker Timothy D Shira, re·anggipa Sombar pringo rang·gitik kamtangko watangani ja·man gital Deputy Speaker-ko seokna nangaha aro ia election-o Opposition dolrangoni darangba susagipa dongjahani gimin Limison Sangma-ko maming susaani grian Deputy Speaker-na seokaha ine Speaker parakataha.
An·tangko Deputy Speaker-ni kamna seokani ja·man Assembly-o jinmana aganprakangengon, uo ka·donge ia biapko una on·ahani gimin Limison Sangma, ruling aro opposition dolgnikon mittelpilangaha.
Ia gital kamko jako ra·anio ua darangnaba mikkang niteani dongna man·jawa ine janapatengon, Assembly-ni kamrangko ua name ka·dilangna gita Sangma ku·rachakaniko on·angaha.
