Pilak a·jarangon minister-rangko tikatna Cabinet-ko sualpiltaia ine CM a·kanga
SHILLONG: Meghalaya a·dokni Chief Minister Conrad K Sangma-chi dilenggipa Meghalaya Democratic Alliance (MDA) 2.0 sorkarini Cabinet-ko Mongolbar salo gital dake sualpiltaiaha aro Cabinet-ko sualpiltaianio gital rimnapa man·gipa sakchet minister-rangko Mongolbar attamo, Shillong songjinmani Raj Bhavan-o ku·mikchetataha.
Gital minister-rangni ku·mikchetaniko a·dokni Governor CH Vijayashankar dilangaha aro ia tom·anio, Cabinet-ni gipin minister-rang, dingtang dingtang dolni dilgiparang, gital minister-rangni ma·drangrang aro sorkari official-rangba dongpae bak ra·angtokaha.
National People’s Party (NPP)-chi dilenggipa MDA 2.0 sorkario rimnapako man·gipa sakchet minister-rangara, sakbride NPP-oni, sakgnide United Democratic Party (UDP)-oni, saksade Hill State People’s Democratic Party (HSPDP)-oni aro saksade Bharatiya Janata Party (BJP)-oni ong·a.
Ia sakchet gital minister-rangara, Jowai-ni MLA Wailadmiki Shylla, Jirang-ni MLA Sosthenes Sohtun, Dalu-ni MLA Brening A Sangma, Resubelpara-ni MLA Timothy D Shira, Mairang-ni MLA Metbah Lyngdoh, Amlarem-ni MLA Lahkmen Rymbui, Mawshynrut-ni MLA Methodius Dkhar aro South Shillong-ni MLA Sanbor Shullai ong·a.
Ia sakchet gital membor-rangko Cabinet-o rimnapna gita sakchet minister-rangko ra·galskaa aro uamangara, NPP-ni Education Minister Rakkam A Sangma, NPP-ni Food & Civil Supplies Minister Comingone Ymbon, NPP-ni Health Minister Ampareen Lyngdoh, NPP-ni Power Minister Abu Taher Mondal, UDP-ni Social Welfare Minister Paul Lyngdoh, UDP-ni Revenue & Disaster Management Minister Kyrmen Shylla, HSPDP-ni Sports Minister Shakliar Warjri aro BJP-ni Animal Husbandry & Veterinary Minister AL Hek ong·a.
Gital minister-ko ku·mikchetatna gita tom·aniko ong·atani ja·man kobor ra·timgipa manderang baksa agangrikengon, pilak a·jarangon Cabinet minister-rangko tikate, namroro silroroaniko ra·bana man·na gita MDA-o bakrimenggipa dingtang dingtang dolrang aro dilgiparang baksa agangrikchengesa Cabinet-ko gital dake sualpiltaiaha ine a·dokni Chief Minister Conrad K Sangma parakataha.
Meghalaya Assembly-o NPP, sak 33 MLA-rang donge doltangarian sorkariko chalaina man·genchimoba, MDA-o NPP baksa bakrimenggipa dolrangna 2023 bilsio ku·chakmanahani gimin Cabinet-o pilak dolni MLA-rangkon bak ong·atenga ineba ua aganaha.
Batanggimin chang Cabinet-o North Garo Hills a·jaoni saksaba minister dongjahaoba ia changode, Assembly-ni gitcham Deputy Speaker aro Resubelpara-ni MLA Timothy D Shira-ko Cabinet-o rimnapskaaha.
Manderangni nangnikani gita sorkari, pilak a·jarangon namroro silroroaniko ra·bana gita Cabinet-o biapko on·aha ine Sangma aganaha.
Ia gital minister-rang, a·dokni namroro silroroanina kamrangko ka·anggen ine an·tangni ka·dongchakenganiko parakatengon, ia gital minister-rangni kamrango Cabinet-o dongsogimin minister-rang dakchakanirangko on·gen ine Chief Minister parakataha.
Ia gital minister-rangna tikatgimin portfolio-rangko bakan jinmana u·iatgen ineba Chief Minister parakataha.