Kuturi ge·saon sak 110 chatro chatrirangko class ra·na nangenga
BAJENGDOBA: Garo Hills-ni bang·a biaprangon skul nokrang namjani a·sel aro badiaba skulrangode skigiparang chu·ongjaengani a·sel a·gilsakni seng·aniko on·anio neng·nikanirangko chagrongna nangengon, North Garo Hills a·jani Dalmangre Non-Government Lower Primary (LP) skuloba skigipa saksanchi sak 110 chatro chatrirangna, kuturi ge·saon skie on·na nangengani a·sel neng·nikanirangko chagrongna nangenga ine kobor on·aha.
Ia Dalmangre songara, Bajengdoba C&RD Block-oni km 23-mang chel·ao donggipa song ong·a aro ia songona rama seng·sot donggenchimoba, rama namjani gimin Gosingpita-Bolsong rama gitasa re·na nanga.
Dalmangre LP skulo kuturi ge·sasan dongaia aro ia skul nokni nokkingko 2012 bilsio mikka balwa ta·rakanganio pe·angani ja·man songni manderang an·tangtangsa ia skul nokni nokkingko tarie on·tokaha.
Ia skul nokko taripilani ja·man re·anggipa bilsioba mikka balwa ta·rakanganio, ia skul nokni nokkingko pe·angtaiaha.
Changgnina kingking mikka balwa ta·rakanganio skul nok nosto ka·ako man·ahani gimin ia apsan songo donggipa SSA UP skulo LP section-koba ra·na bi·aha.
Kobor on·timgiparangni u·iatani gitade, UP section-o gital building-ko rikani ja·man kuturi ge·gni gitchaaha aro iakon LP section-na on·aha. Indake ong·genchimoba, LP section-o poraienggipa bi·sarang sak 100 batpilani gimin ia chonchongipa kuturi ge·gnio chakskajaha aro skigipaba saksasan ong·ani gimin kuturin ge·gnio skie on·nade namen neng·ani ong·skaaha.
2023 bilsio ia skulo sak 77 chatro chatrirang biming segataha, 2024 bilsiode sak 86-ona baridapaha aro ia bilsiode sak 110 chatro chatrirang poraienga ine kobor on·timgiparang parakataha.
Skigipa chu·ongjae neng·nikanirangko chagrongna nangahani gimin ia skulni skigipa Gamchi Momin, ia songo skia pora dongkalgipa chadamberangko dakchake on·na rimaha aro uamangna ua an·tangni dormahaonikon tangka paisarangko on·skaaha.
“Ia skulo skigipa dongjani a·sel indita sak chatro chatrirangna skie on·anio namen neng·nikanirangko chagrongna nangenga. Uni gimin skigipa saksako man·dapgenchimode bang·en dakchakani ong·genchim indiba ia skulara non-govt LP skulsa ong·ani gimin chinga dakchakanirangko chu·onga gita man·paja,” ine skulni skigipa Gamchi Momin aganaha.
Dalmangre LP skulni president Nepjing Marak-ba ia skulna dakchakanirangko on·na gisik nangjaengani gimin sorkari official-rangko matnangataha.
Marak-ni parakatani gitade, ia bilsini a·bachengachibara uamang, ia skulna skigipako on·dapchina gita North Garo Hills a·jani DI-ko grongeahachim indiba skigipako rakkidapna gita tangka paisarang dongjani a·sel skigipako on·dapna man·jaenga ine aganchakaniko on·ataha.
“Chingna dakchakanirangko on·na gita ku·rachakaniko on·ani pal ua chingkosa skigipako rakkidapenba, an·tangtang dormahakoba on·china aganataha. Chinga bi·sarangni namgninasa chanchie uni dakchakaniko bi·epaahachim indiba ua chingna maming ka·dongatani kattarangko on·jahani gimin chinga namen suk ong·ja,” ine Marak aganaha.