SHILLONG: Shillong songjinmani Nongrah Nonglum-o bilsibri ong·gipa me·chik bi·sa Insaphira Lyngdoh-ko ka·saninggija dake so·ote galani bidingo ta·rake sandirokchina gita Meghalaya State Commission for Protection of Child Rights (MSCPCR), a·dokni police-rangna ge·etaniko on·angaha.
Iani bidingo seachi u·iatengon, so·ota man·gipa me·chik bi·sa aro uni nokdangna kakket bichalko on·na aro pilak nanga dakchakanirangko on·na gita ia a·selko ta·rake sandirokna nangchongmotengani gimin Commission, a·dokni police-rangna ge·etaniko on·ataha ine MSCPCR-ni chairperson Agatha K Sangma parakataha.
Ia bilsibri ong·gipa me·chik bi·sa Insaphira Lyngdoh Mawnai, Robibar pringo, an·tangni nok sambao kal·e roengmitingo gimaahachim indiba Sombar pringo, uni sigimin manggisikosa, apsan gittimon gital rikenggipa nok te·sao, ditdoe dongenggipa mikkachio ro·ongchi onjetdape donakosa man·aiahachim.
Ia me·chik bi·sani manggisiko man·ani ja·man, ia bi·sako so·otanio jak donggipa manderangko rim·na a·dokni Police-rang, Superintendent of Police (City) Herbert Kharkongor-ni dilanichi dingtangmancha special investigation team (SIT)-koba songaha.
Indake ong·engon, ia me·chik bi·sako so·otani bidingo koborko man·soa bakan Commission-ni membor-rang, sianggipa me·chik bi·sani nokdangko grongeaha ine MSCPCR-ni chairperson Agatha Sangma parakataha.
Ia nokdangni manderangna ka·dimeaniko on·na aro me·chik bi·sani manggisiko post mortem ka·anio pilak nanga dakchakanirangkoba Commission-ni membor-rang on·angaha.
“Iandake mandeni janggiko ra·aniara, mongsongbate bi·sarangko ka·saninggija dake so·otaniara namen kragijani ong·a. Iandake kalimani somoio ia Commission, kalimenggipa nokdang baksa ong·enga,” ineba Sangma parakataha.
Ia me·chik bi·sani siani noksarangko social media-rangko watjojojachina gitaba MSCPCR mikrakataniko on·angaha.
“Iandakgipa kamrangara Juvenile Justice Act (JJA)-ni ning·o ga·aka aro rakgipa sastirangko man·ani ong·a,” ine Sangma parakataha.