WILLIAMNAGAR: Meghalaya-ni Chief Secretary, DP Wahlang, East Garo Hills -ni Deputy Commissioner RP Marak-ni dongpaanio Additional Deputy Commissioner, Block Development officer, PHE-ni Executive Engineer, ICDS-ni District Program Officer, Supply-ni Deputy Director, Williamnagar Municipal Board, DM&HO-ni CEO, DSEO aro sorkarini a·gipi officer-rang baksa tom·e East Garo Hills district-o aadhar enrollment ba biming segatani kamrangko unbaksana sorkarini dingtang dingtang scheme-rangni namgnirang beneficiary-rangona sokengama sokjaenga iarangko nirokangaha. Iarangni gisepon Pradhan Mantri Awas Yojana (PMAY) scheme-ni bidingoba nipilangaha. Williamnagar Circuit House-o tom·angaha.
Sorkarini on·enggipa dingtang dingtang scheme-rang jekai MHIS, NFSA, Old Age Pension, MGNREGA ba uandakgipa scheme-rangni namgniko man·a gita aadhar-ko nangdimatani bidingo, district-o enrollment centre-ko donnani bidingrango chanchirimangaon Chief Secretary, officer-rangko district-ni pilak manderangkon aadhar-na biming segatrikchina ge·etaha. Maina aadhar-na biming segatani somoi je somoiba bon·changdiknaba gnang uni gimin somoi dongmitingon biming segate ra·china mol·molaha, jedakode manderang sorkarini scheme-rangko altue ra·na gita man·gen.
Iarangni gisepon Chief Secretary, jilla aro songadamrango PMAY-ko ra·gatani bidingo nipilangaon scheme-ko ra·gatanio maidakgipa neng·nikarangko man·enga, beneficiary sakprakna badita tangkako on·a, nok rikaniko matchotna maini gimin ru·utenga iarangni giminba nipilangaha. Uandake PMAY (urban)-na ta·raken Meghalaya sorkari gital guideline ba niamrangko on·gen ineba aganaha.
