TURA: Skill Development & welfare activities campaign-ni bakni gita State Bank of India-Rural Self Employment Training Institute (SBI-RSETI), Tura, Enable India Bethany Society baksa melie September 16 tariko Bakdil Training Centre, Tura-o programko ong·ate Smt. Jepora Sangma-ko mande ra·angaha. Uan be·enni gita neng·nikarangko man·gipa ong·genchimoba saksa ma·gipa ong·a.
Jepora, jean West Garo Hills Rongram C&RD Block-ni ning·o ga·akgipa Degranggre songoni ong·a, ua Female Entrepreneur of the Year Samagama 2025-ko cheaha. Indake tom·anio ua an·tangni janggi tangani gimin parakatengon maidake business-ko a·bachengbaaha iani gimin aganaha. ICDS office-ni CMARE scheme-ni on·gipa gong 2,000 tangkachi business-ko a·bachengaha. Entrepreneurial training-ko ra·a matchote ua an·tangni Bakery-ko a·bachengaha jeoniko da·ode ua japrakon gong 16,000 man·enga.
Uni entrepreneurial skills ba uni business chalaina changa sapanina mejaomangmang Karnataka Bengaluru-o Samagama 2025-o Best Female Entrepreneur award-ko on·aha. Ua an·tangni tarigipa cha·anirangko Rongram bazar-o palenga. Uni product ba tarigipa cha·ani bimingni brand-ara ‘Brokers’ ong·a.
Tom·anio Social Welfare Department-ni Additional Director Hemaritha Ch. Sangma, mongsonggipa sokgipa ong·e bakko ra·engba tom·anio mikkim rasongko bariataha.
