SHILLONG: Meghalaya Commercial Truck Owners & Drivers Association (MCTODA)-ni dilgipa sakbriko, Sombar salo kachari jamin on·ani ja·man Mongolbar attamo, Shillong District Jail-oniko watpilaha.
Ia manderangara, MCTODA-ni president Mosklandar Marngar, Teibor Marngar, Thrangbor Lyngdoh, aro Heibor Pariat ong·a.
MCTODA-ni dilgiparangko watpilani ja·man, uamangni nokdangni manderang aro uamangna chakpagipa manderang, jail a·palo baditaba kontarangna sengani ja·man, kusi ong·bee rimchaksotokaha.
MCTODA-ni dilgipa sakbriko, re·anggipa November-ni 5 tariko, Meghalaya Maintenance of Public Order (MMPO) Act aro Bharatiya Nyaya Sanhita (BNS)-ni ning·o dingtang dingtang case-rangna rim·ahachim.
Police-rangni u·iatani gitade, ia mande sakbriko, sorkari officer-rangko champenganina, gipinrangko dokanina, mande rim·gittanganina aro mande so·otna jotton ka·anina matnange, Mawryngkneng Police Station-o badi ka·ahani gimin rim·aha.
Ia manderangna Sombar salon kachari jaminko on·ahaoba Mongolbar saloba, uamangko watpilani chittiko Shillong District Jail-na on·atahani gimin Mongolbar attamosa watpilaha.
