SHILLONG: Meghalaya a·doko Congress dolni mitam dilgiparang, Meghalaya Pradesh Congress Committee (MPCC)-ni president Vincent H Pala-ko ra·galchina All India Congress Committee (AICC)-ko didiaha ine mitam dilgiparangni agananirangko knasona man·engon, ian party-ni ning·o saksa sakgni dilgiparangni nangnikanisan ong·aia ine Pala parakatskaaha.
Iani bidingo kobor ra·timgipa manderang baksa agangrikengon, Congress dolni ning·o dilgiparangko bodolengon, niamrangko ja·rikesa dakronga aro saksa sakgni dilgiparangni nangnikaiani giminde ong·na man·ja ine MPCC-ni president parakataha.
“Ia pilakan politics-ni kamrangsan ong·aia. Congress membor sakantian block president, district president ba state president ong·na nangniktoka aro ian ong·rongbewalsan ong·aia. Indiba dilgipako seokanio Congress dolo dingtangmancha niamrang donga. Saksa sakgni dilgiparang nangnikaiani giminde block president, district president ba state president-ko ra·galna man·ja,” ine Pala aganaha.
Congress party-de skatang bilko jakkale rogipa party ong·ja indiba niam retirangko ja·rikgipa national party-sa ong·a ineba ua talataniko on·angaha.
“Congress party-de gipin dolrangoni kal·ake rona man·gipa party ong·ja indiba niamko ja·rike, kangal cholgrirangna, chonchongipa jatrangna aro Scheduled Caste/Scheduled Tribe-rangna kam ka·gipa party-sa ong·a,” ine MPCC president aganaha.
Mitam dilgiparang, uni kamo kusi ong·jae, party-ko wate katna miksongenga ine jangbingbanganirangna aganchakaniko on·angengon, da·o darangba unbaksa meligrikjae, Congress dolko wate katgiparang dongkuja ine Pala aganaha.
“Angni a·sel saoba party-ko wate katgipa dongode angna aganbo. Da·o dipet angbaksa meligrikjae party-ko wate katgipa mande saksakoba anga nika dongkuja. Bang·batan an·tangtangni nangnikani giminsa party-ko wate re·angtokaha indiba angni a·selde ong·ja,” ine MPCC president aganaha.
