GHADC election-na Congress tarisamsoengaha
SHILLONG: A·dokni gitcham minister Zenith M Sangma-ni Trinamool Congress (TMC)-ko wate Congress dolona re·bapilani ja·man da·o TMC-ni gipin dilgiparangko man·chape, dingtang dingtang dolni dilgiparangba Congress dolo napna sienga ine Budbar salo, Meghalaya Pradesh Congress Committee (MPCC)-ni working president Deborah Marak a·kangataha.
TMC aro gipin party-rangni dilgiparangko Congress dolona rimchaksona gita party tarisamsoenga ine janapatengon, “Congress dolo napna sienggipa manderang bang·en donga aro uamang saksani ja·man saksa dake re·baenga. Mitam kattarangkode chinga politics-o dongnuna nangaia, uni gimin somoi sokjokon chinga na·simangna parakaigen,” ine Marak, Congress dolo napna sienggipa dilgiparangko biming minggija, kobor ra·timgiparangna aganaha.
TMC-ni MDC-rangba Congress dolo napna sienga ine jangbingbangenggipani gimin sing·anina aganchakaniko on·angengon, “Uamang bakan Congress dolo napna siengaha, haida uamang bakan sokbanaba dongaha,” ine Marak aganaha.
National People’s Party (NPP)-oniba Congress dolo napna sienggiparang dongama ine sing·skaon, iani giminde da·o dipet ua ma·sikuja ine MPCC-ni working president aganchakaha.
Zenith Sangma-ni TMC-ko wate Congress dolona re·bapilani ja·man, TMC-ni dilgiparangko man·chape dingtang dingtang party-ni dilgiparangba batanggimin sal somoirango Congress dolo napangtokahachim ine nikna man·a.
Indake ong·engon, re·baenggipa 2026 bilsini a·bachengachibara ong·atna sienggipa Garo Hills Autonomoys District Council (GHADC) election-na Congress dol tarisamsoengaha ine MPCC-ni secretary Manuel Badwar parakatskaaha.
“Ia sal somoirango manderang, Congress dolna gisik on·piltaina a·bachengahani gimin Congress tangchapiltaichongmotgnok. Manderang jegitaba Congress dolko matnangchina da·o rama dingtangko re·na a·bachengengaha,” ine Badwar aganaha.
Bang·a dilgiparangan Congress dolo napna siktokengoba Congress dol simsakesa dilgiparangko rimnapgen ineba ua aganaha.
“Gipin party-ni dilgiparang Congress dolo napna skaiani gimin uamang napgen ba uamangko napna on·gen, indake ong·jawa. Chinga dilgiparangko nirokesa aro uamang mai miksonganio Congress dolona re·baenga, uko nichengsa party-ona rimnapgen,” ine MPCC-ni secretary aganaha.
Zenith Sangma-ko Congress party-o rimnaptaipilani gimin janapatengon, ua an·tangni skani gitasa party-oni ong·katangaha indiba uno Congress dolna ka·saani dongkuengani gimin party-ni dilgiparang, uko nokchakna kusi ong·aha ine Badwar parakataha.
A·dokni gitcham chief minister aro TMC-ni dilgipa Mukul Sangma-ni giminde ua mamingkoba aganna jechakskaaha.
