SHILLONG: Meghalaya a·doko mikgri ong·e dongenggipa bi·sarangna dakchakanirangko on·na man·na gita a·dok gimikonikon am·sandienba biming segatchina gita a·dokni Governor CH Vijayashankar, Social Welfare department-na ge·etaniko on·angaha.
Sukrobar salo, mikgri bi·sarangna Children’s Day ba bi·sarangni salko Shillong songjinmani Raj Bhavan-o manianio ia kattarangko a·dokni Governor aganaha.
Mitam bi·sarangde atchiaonin mikgri ong·a indiba mitam bi·sarangde a·sel ong·anirangchi ba dingtang dingtang a·selrangchisa mikgri ong·na nangaha ine iandakgipa bi·sarangna nikpiltaianiko on·na man·na gita cholrangko sandichina gita Governor ku·pattianiko on·angaha.
Iandakgipa mikgri bi·sarangna on·gilna nangengani gimin aro nanga gita sanna bananirangko on·na nangengani giminba Vijayashankar aganaha.
Mitam hospital-rango, mongsongbate Kerala a·dokode bilsi 14-na komigipa bi·sarangkode mikronni saanirangko sanna gita cholrang donga aro iandakgipa hospital-rango mikronko Ayurvedic-chi sanna gita man·a ine janapatengon, tong·sa mikgri ong·aigipa bi·sarangnade sal 15-ni gisepon nikpiltaina gita sanna bananirangko on·na man·a ine Governor parakataha.
Ia hospital-rango, a·dokni bi·sarangkoba ra·chake sanna bananirangko on·china gita sorkari mol·molgen ineba ua ku·rachakaniko on·angaha.
Be·enni gita cholgri ong·gipa bi·sarangni namgnina sorkari kamrangko ka·enga ine janapatengon, iandakgipa bi·sarangna ua man·a dipet dakchakanirangko on·gen ine Vijayaskankar ku·rachakaniko on·angaha.
Be·enni gita cholgri ong·gipa bi·sarangba name nirok sandigipa aro skie on·giparang donga ong·ode, doka dam·ani, chi jroani ba git ring·anirango teng·sugiparang ong·na man·a ine janapatengon, iandakgipa bi·sarangni changa sapanirangko sandienba namdapatna dakchakchina a·dokni Governor, Social Welfare department-na ge·etaniko on·angaha.
 |
|
