SHILLONG: Garo Hills Autonomous District Council (GHADC) election da·o sepangrorobaengahaon, a·doko namroro silroroaniko ra·bana man·ahani gimin chegipa ong·na man·aigen ine National People’s Party (NPP) ka·dongchakenga.
NPP-ni working president aro a·dokni Cabinet Minister Marcuise N Marak-ni parakatani gitade, GHADC election-na NPP, ka·dongani gnang kamrangko ka·soenga aro a·dokni dingtang dingtang biaprango namroro silroroaniko ra·bana man·aha ine manderangni chakpaanikoba man·na ka·dongenga.
“A·doko ong·enggipa obostarangni bidingo chinga chanchirimanaha aro da·o chinga manderangni chakpaaniko man·na gita uamangona re·anggen. Chinga manderangni chakpaaniko man·na namen ka·dongenga,” ine Marak aganaha.
Garo Hills-o Congress dol bilakbapiltaiengaha ine a·kanganiko jegalatengon, NPP-ni chu·sokatgipa kamrangko uamang (Congress) susana amgenma ine Minister sing·doataha.
“Political party ge·antian an·tangtang chegen ine aganenga indiba NPP-ni kosako re·na gita uamango mai donga?” ine Marak song·doataha.
A·doko sorkariko chalaienggipa NPP, manderangna ku·rachakanirangko chu·sokataha aro ku·sikmangmangchisan ong·aigija kamrangchiba mesokaha ine ua aganaha.
“Dakna nanga kamrang pilakkon NPP dakaha. Chinga an·tangtangni bil ama gitan kamrangko ka·aha aro manderangba iako ma·sia. Chinga ia kamrangni gimin gaora dakjaenga indiba chingni kamrango pangchakesa chinga manderangni chakpaaniko nangnikenga,” ine Marak aganaha.
NPP-ni namroro silroroatani kamrangna campaign ka·anirangna bate ku·rangko on·aigen ineba NPP-ni working president aganaha.
“Chingni kamrangsa ku·rangko on·gen aro GHADC election-o NPP-ni kamrangan, chegipa ong·atna dakchakgen,” ine ua a·kangaha.
