AMPATI: Ja·manchake koborko on·ani gitade, re·anggipa November 11 tarikoni 14 tarikona, South West Garo Hills a·jani Balalgre-o donggipa Captain Williamson Sangma State University (CWSSU)-o National Education Day-ko maniani bak gita Application of Basic Statistics-ni biding workshop-ko ong·atangaha.
National Education Day-ko maniani bak gita, salsani Symposium-ko November-ni 11 tariko ong·atangaha aro ia program-ko ong·atanio, MBOSE-ni gitcham Executive Chairman Tony TC Marak, mongsonggipa sokgipa ong·e bak ra·angaha. Ia program-ko ong·atanio, Tura Don Bosco College-ni Principal Rev Fr Januarius S Sangma, CWSSU-ni Registrar Ambrose Ch Marak aro Deputy Registrar Singje Ch Marak-ba dongpae bak ra·angaha.
Ia Symposium-ko ong·atanio, Prof. Sherwin May Sungoh, Prof. Brinda Bazely Kharbirymbai, Dr. Challang R. Marak, and Dr. Donberd Sangma, National Education Policy (NEP) 2020-o pangchake, dingtang dingtang kamrangni gimin agan-talatanirangko on·angaha.
Ia symposium-ni ja·man November-ni 13 aro 14 tarikrango, Application of Basic Statistics in Research and Education-ni bidingo workshop-koba ong·atangaha aro ia workshop-o sak 100-na baten postgraduate chatro chatrirang bak ra·angtokaha.
Ia workshop-ko CWSSU-ni Vice Chancellor Dr Vasanthi Vijayakumar, a·bachengate on·angaha aro workshop-o NEHU Tura Campus-ni Prof Nikme SC Momin, NEHU Tura-ni Prof SC Subudhi, NEHU Shillong-ni Prof Brinda B Kharbirymbai aro NLU Shillong-ni Dr Dikki N Marak, agan-talatanirangko on·angskaaha.
