SHILLONG: A·dokni gitcham chief minister aro Trinamool Congress (TMC)-ni dilgipa Mukul Sangma, da·o gital ja·kuko de·chakatna gita dingtang dingtang dolrang baksa agangrikengon, ua (Mukul) an·tangan 2023 bilsini Assembly election-na skang Congress-ko wate katani ja·man party-ona re·bapiljawaha ine aganahani gimin Congress-ona re·bapilnaba dongaha ine Sombar salo, Meghalaya Pradesh Congress Committee (MPCC)-ni president Vincent Pala parakataha.
Mukul Sangma, Congress-ona re·bapilgenchim ong·ode maikai Mukul aro Tura-ni MP Saleng A Sangma-ni gisepo meligrikatna gita party songgigrikna miksongenga ine sing·anina aganchakaniko on·angengon, politics-de namen mangkimgipa kam ong·a aro politics-ode ripeng ba bobil ong·kamani dongja ine Pala aganaha.
“Congress-de darangniba gam-jin ong·jani gimin chinga party-ona re·baenggipa manderangkode jekoba nokchakrongaia,” ine Pala aganenba, Mukul Sangma an·tangni gadangko ma·sigipa ong·a aro ua an·tangan Congress-ona re·bapiljawaha ine aganmanaha ine parakataha.
Congress-ona bang·a manderangan re·bapiltokenga aro Cabinet-oniko ra·gala man·gipa bang·a dilgiparangba Congress-ona re·bana nangniktokenga ine janapatengon, namgipa aro rake kam ka·gipa candidate-ko party seoka ong·ode Congress chu·sokgipa ong·telgen ine MPCC-ni president parakataha.
Congress dolo dilgipani kamna meligriktokjaenga ine matnanganirangkoba Pala jegalataha.
“Media-osan iandake dilgipani bidingo meligrikgijanirangko knana man·enga indiba party-ode darangba maming neng·nikani dongja,” ine Pala aganenba, party-ko wate katgipa manderangsa, an·tangtangni ong·katani a·selna sakoba matnangna gita iandake dilgiparangko matnangtokenga ine parakataha.
Dilgiparang nangnikenga dipetde ua Meghalaya a·doko Congress dolko dilangkuaigen ine janapatengon, ukode darangba skatang ra·gale galna man·jawa ine Pala aganaha.
