TURA: Garo Hills Autonomous District Council (GHADC)-ni ning·o koela aro ro·ong salruragipa garirang, nangana bate gatenba salruraenga ine Tura-ni MDC aro BJP-ni state vice president Bernard N Marak matnangataha aro Garo Hills-o iandake niam gri koela aro ro·ong salruraaniko champengchina GHADC-ni Chief Executive Membor (CEM)-na sedoataha.
Marak-ni CEM-na sedoatgipa chittio janapatani gitade, Indian Constitution-ni Article 141-o pangchake, koela aro ro·ongrangko salrurana gita Meghalaya High Court-ni dongimin niamrang dongachim indiba GHADC-ni ning·o koela aro ro·ong salruragipa garirang, challan, TNT aro gipin nangchongmotgipa lekkarang grisa salruraengani gimin High Court-ni dongimin niamrangko pe·ani gita ong·enga.
“GHADC-ni a·jao iandake koela aro ro·ongrangko salruraaniara, High Court-ni dongimin niamrangkosan pe·ani gita ong·jaenga indiba Motor Vehicles Act 1988-ni Section 113-115-ko aro GHADC-na Sixth Schedule-ni ning·o on·gimin bilrangko pe·ani gitaba ong·enga,” ine Tura MDC parakataha.
Indake ong·engon, GHADC-na Sixth Schedule-ni ning·o on·gimin bilrangko jakkale, High Court-ni dongimin niam gita koela aro ro·ongrangko salna gita ge·etaniko on·china Marak, GHADC-ni CEM-ko didiataha.
GHADC-ni a·jao koela aro ro·ongrangko salruraengon, challan, TNT aro gipin nangchongmotgipa lekkarang dongna gita ge·etaniko on·chinaba ua GHADC-ni CEM-ko didiataha.
Dongimin niamrango pangchake, niam pe·giparangni kosako rakgipa ja·kurangko de·china aro niam pe·gipa garirang baksana koela aro ro·ongrangko rim·china gitaba Tura-ni MDC, GHADC-ni CEM-ko didiataha.
