SHILLONG: Re·baenggipa 2028 bilsini Assembly election-ko ong·atanio dingtang dingtang dolrang bakrime sorkariko chalaigen ine Budbar salo, Opposition dolni dilgipa Mukul Sangma ku·watsoaha.
2028 bilsini Assembly election-na skang ua badia party-oni susana miksongenga, iani bidingo parakna gita jechakangkuengon, national party-rang pangnan a·songo sorkari chalaiani bewalko bilgriatna jotton ka·ronga aro iani giminsa ua Congress-oni ong·kataha ine Sangma parakataha.
Chief Minister-ni skani gitasa minister-rang Cabinet-o dongna man·aia ine janapatengon, Congress dolni high command, Cabinet-o sako donskana nanga aro sako ra·galna nanga, uko ge·ettimanichi Cabinet-ni rongtalaniko mande ra·jaha ine Sangma aganaha.
“Prestone Tynsong aro Sniawbhalang Dhar-ko anga Cabinet-oniko ra·galna draatako man·jachimma aro party-ni president-koba ua somoio gitalkosa songaha,” ine a·dokni gitcham Chief Minister aganenba, Assembly election-na jadok skangsan Congress dolni saksa ja·delbatgipa dilgipa Dr DD Lapang-ni pal Dr Celestine Lyngdoh-kosa songskaahachim ine parakataha.
Cabinet-ko nirokanide Chief Minister-ni daitoan ong·a ine janapatskaengon, sorkariko chalaianide political party-ni kam ong·ja indiba Cabinet-ni kamsa ine Sangma talataniko on·angaha.
“Nang·ko high command-sa ge·ettimenga ong·ode maikai sorkariko chalaina man·gen?” ine Sangma sing·doatenba, ia somoirango manderangni nangnikanirangko nigenchimode 2028 bilsio dingtang dingtang dolrangsa bakrime a·dokko chalaigen ine mesokani ong·enga ine parakataha.
A·songni dingtang dingtang political party-rang baksa chanchirimaha ine badiaba badiaba songbadrango seaniko jegalatengon, Meghalaya a·doko NPP sorkariko BJP-sa songaha aro Congress dolba NPP baksaan bak ong·angani gimin ua BJP aro Congress dol gita dakgipa party-rang baksa chanchirimna nangnikani dongja ine Sangma parakataha.
