SHILLONG: Re·baenggipa 2026 bilsio ong·atna sienggipa Garo Hills Autonomous District Council (GHADC) election-o National People’s Party (NPP)-ni tikitchi susana sikenggipa manderangna dorgasto galani matchotaha aro bakan party-ni gita candidate-rangko seokenba jinmana parakatgnok ine Budbar salo, NPP-ni working president aro a·dokni Cabinet Minister Marcuise N Marak parakataha.
Marak-ni parakatani gitade, da·o dipet NPP-ni dilgiparang, GHADC election-na candidate-rangko seokkuja indiba party tikitna dorgasto galanikode dontongataha.
“Da·o dipet chinga candidate-rangko tik ka·kuja indiba party tikitna dorgasto galanikode dontongataha. NPP-ni tikitna dorgasto galgiparang kraa gita bang·aha aro bakan candidate-rangko basena gita NPP-ni election committee tom·gen,” ine Marak, kobor ra·timgiparangna aganaha.
GHADC-ni dingtang dingtang constituency-rango NPP-ni tikitchi susana gita dorgasto galgipa manderang aditan donga aro mitam constituency-rangode party tikitna dorgasto galgiparang sakgittamoni saksnimangan donga ine janapatskaengon, GHADC-ni dam 29 constituency-rangon NPP, candidate-rangko susaatgen ine NPP-ni working president parakataha.
Garo Hills-o Rangsakona-ni gitcham MLA Zenith Sangma aro gipin dilgiparangni re·baanichi Congress dol bilakbapiltaiengaha ine agananikoba Marak jegalataha.
“Gambegre by-election-oba chinga Zenith Sangma-ni jikgipa chee, Gambegre seat-ko man·aha. Uni gimin ia GHADC election-oba chinga chu·sokgipa ong·na namen ka·dongenga,” ine Marak aganaha.
GHADC election-o Congress dol bilaken susana sienga ine janapatengon, “Susagrikanirangde election-ni bakan ong·aia indiba ian chingna maming neng·nikaniko on·jawa,” ine a·dokni Cabinet Minister aro NPP-ni working president parakataha.
