Headmaster-ko chu·gimik kam ra·galchina songni manderang dabia
BAGHMARA: South Garo Hills a·jao, Mon Rongsna Government Lower Primary (LP) skulni headmaster Headring M Marak, 2015 bilsionin skul re·chipgija dormaha oke cha·aha ine songni manderang matnangatenba, ia headmaster-ko chu·gimik kam ra·galsrangchina sorkariko didiataha.
Iani bidingo songni manderangni pal, social activist Greneth M Sangma, South Garo Hills a·jani Sub-Divisional School Education Officer (SDSEO)-na badi ka·e sedoataha aro ia headmaster-ni kosako rakgipa ja·kurangko de·china didiataha.
Sangma-ni badi ka·e sedoatani gitade, ia skulni headmaster, 2015 bilsionin skulchi re·chipjahani gimin songni manderang changni chang badi ka·ahaoba ua kamtangchi re·na gisik nangchipjaha aro ja·mano ia headmaster-ko bilsi bongana suspend ba kamoni dontongatahaoba, ua skulchi re·gija, apsan daken an·tangni dormahako oke cha·kuenga.
“Ia skulni managing committee aro Mon Rongsna Govt LP skulni president baksa tom·e chanchirimon, skulni headmaster Headring M Marak, 2015 bilsionin da·o 2025 bilsionan skulchi re·gija dormaha oke cha·enga ine ma·sina man·aha. Skul managing committee-ni aganani gitade, ia skigipani kosako uamang baditaba chang badi ka·doahachim indiba da·onan maming ja·kurangko de·chipkujaenga. Uni giminsa da·o ia headmaster-ko terminate ka·china ba chu·gimik kam ra·galsrangchina managing committee aro songni manderang nangniktokenga,” ine Greneth parakataha.
Ia headmaster-ni skul re·chipjani a·selan sak 20 batpile chatro chatrirang, poraiako dontongna gita nangtokaha ine janapatengon, ia skigipani a·sel songsalna, a·songna aro mongsongbate A·chik jatna dal·en gimaani ong·aha ine Greneth parakataha.
“Uni gimin sorkarini service rule-rango pangchake ia headmaster-ko sal 15-ni gisepon kamoniko ra·galsrangchina aro uni biapo sakgipin headmaster-ko rakkiskachina anga didienga,” ine Greneth parakataha.
