Rochakgipa biaprangko taridapna krorni kror tangkarangko chamata: Tourism Minister
RESUBELPARA: North Garo Hills a·jao salgnina ong·atenggipa A·we Festival-ko Mongolbar salo, a·dokni Tourism Minister aro Resubelpara-ni MLA Timothy D Shira, Resubelpara Mini Stadium-o a·bachengate on·angaha.
A·we Festival-ko a·bachengatanio, Kharkutta-ni MLA Rupert Momin, Mendipathar MLA Marthon Sangma, North Garo Hills a·jani Deputy Commissioner Dr Abhishek Saini, dingtang dingtang official-rang aro gipinrangba bak ra·angtokaha.
A·we Festival-ko a·bachengate on·anganio a·dokni Tourism Minister Timothy D Shira, jinmana aganprakangengon, ia bilsio A·we Festival-ko ong·ataniara namen dingtangmanchagipa ong·enga maina ia manianio North Garo Hills-ni daka rikanirangko ripingna aro tang·doatna miksonganisan ong·aigija jolo game ge·e cha·enggiparang, ma·manti jakni kamko ka·e cha·enggiparang aro chadamberangni changa sapanirangko ra·dona cholko on·aniba ong·enga ine parakataha.
Exhibition-ko ong·atanio dingtang dingtang bosturangko mesokaniara, songo noko kam ka·e cha·enggipa manderangni kamtango bimchipaniko mesokanian ong·a ineba ua aganaha.
A·we Festival-ara North Garo Hills a·jao songdongenggipa manderangni daka rikanirangko aro changa sapanirangko nie ra·na chol gita ong·a ine janapatengon, iandakgipa program-rangko ong·atanichi gipin biaprangoni manderangko salbana aro jolo songdongenggipa manderangni janggi tangani bewalko mesokna namgipa chol ong·a ine Shira aganaha.
North Garo Hills a·jani dingtang dingtang biaprang, jekai Jolding Wari, Rongma Gitil, Na·ka Chikong, Do·bakkol, Rongpetchi aro Radi Nokat-o donggipa Shiva Lingam baksana dingtang dingtang biaprangko taridapna gita sorkari, krorni kror tangkarangko chamataha ineba ia tom·anio Tourism Minister parakataha.
North Garo Hills a·jao tourism-ko tang·doatna gita sorkari rakbee kamko ka·enga ine janapatengon, an·tangtangni changa sapanirangko jakkale, bading chiwalanirangkoba an·tangtangna janggi tangani chol dake ra·china gita Shira, chadamberangko didiangaha.
Ia A·we Festival-ni skanggipa salo, Horticulture Department-ni Flower-cum-Vegetable Show, District Commerce & Industries Centre (DCIC)-ni Industrial Exhibition, Miss A·we Beauty Pageant, A·we Dance Battle, aro joltangni git ring·anirangkoba nikangna man·aha.
Gnigipa sal, chong·motan da·al Budbar salni bakoba, dingtang dingtang program-rang, jekai jatni kal·susaani, jatni chrok mesaanirang aro ring·anirang aro bon·kamao Rock Concert-ko ong·atanio, Ahowee, North Wind, Nokpante, Jessie Lyngdoh aro Riprap dolni git ring·anirangkoba nikangna man·gen.
