AMPATI: Bangladesh a·songo sorkari dingtang ong·anichi, South West Garo Hills aro Bangladesh a·songni simarango ong·gijagipa manderangni re·ruraani aro ma·manti bosturangko badingsrukanirangna kenchakna nangani ong·engani gimin Bangladesh a·song baksa nangchapgipa South West Garo Hills a·jani pilak simarangon, fencing kagipaoni a·songni ning·ao metre 200-ona kingking ‘Night Curfew’ ba walni curfew-ko ra·gataha ine South West Garo Hills a·jani Deputy Commissioner Hema Nayak u·iataha.
Ia pilak simarangon walni curfew-ko ra·gatahani gimin attam 8:00 bajioni pring 6:00 bajiona, ia simarango manderangni re·ruraanirangko champengataha ineba SWGH a·jani Deputy Commissioner u·iataha.
Deputy Commissioner-ni u·iatani gitade, Bangladesh a·songo so·sojengjeng ong·engani gimin ong·gija dakgipa manderang, sima jolrango ong·gija kamrangko aro ma·manti bosturangko niam gri badingsrukna jotton ka·ani cholrang dongnaba gnang ine niksamsoenba, ia sima jolrango walni somoio manderangni re·ruraaniko champengna ‘Night Curfew’-ko ra·gatangaha.
South West Garo Hills aro Bangladesh a·songni simarango Night Curfew-ko ra·gatahani gimin, dongimin somoirango darangba simarango re·rurana man·jawa, sakbonga ba una bate jinma tom·na ba re·jomna man·jawa, silchidare dake jakkalna man·gipa bosturangko ra·bitna man·jawa, ma·manti bosturangko badingsrukna man·jawa ineba South West Garo Hills a·jani Deputy Commissioner, mikrakataniko on·angaha.
