SHILLONG: Garo Hills-o chongipa jatrangna ge·sa Minority Regional Council-ko bikote on·china dabienganiko A·chik Conscious Holistically Integrated Krima (ACHIK) rakgen jegalaha, aro iako songe on·genchimode ia A·chik manderangni constitutional rights ba bil-rengsiko pe·a ga·akgen ine aganaha.
Regional council-ko songchina uamangni de·e ra·baaniara, Indian Constitution-ni Sixth Schedule-ko jegala ga·akenga, je bilkon Garo Hills-o songdonggipa A·chik tribal jatrangna, an·tangtangan jakgitele sason ka·china gita dingtangmancha pe·oke on·gimin ong·a ine ACHIK aganaha.
“Indiani Niam-Bidiko segatgiminoniko dingtang dake ge·sa Minority Regional Council-ko songgenchimode ian, dakbade kam ka·asan ong·aija indiba Sixth Scheduled-ni miksongani bilko ra·biani ong·gnok” ine uamangni chittio janapaha.
Iako dabianina Garo Hills-o songdonggipa minority jatrangko mantnange aganengon, Council-ko songe on·china de·e ra·baaniara, ‘‘bak ong·atani, constitution gita ong·gijani aro A·chik manderangni dakbewal aro constitutional rights-na neng·nikaniko ra·bagen ine ACHIK aganaha.
Indake ong·engon, uamangni ia council-ko songe on·china dabianiara political-ni gita didiataniko man·ani giminsa ong·enga, aroba jatrangni gisepo nanggrikatna aro songsalo meli-nangrime donganiko nanggrikatna dakanisan ong·aigen ineba chittio janapataha.
“Tribal-rangna on·gimin bil-rengsiko onchepna jotton ka·aniko Garo Hills Autonomous District Council (GHADC)-na on·gimin bilko bilgriatna am·aniko chinga mamingdakeba nie dongjawa,” ACHIK aganaha, unbaksana an·chingna on·gimin bil-rengsiko ku·cholsan warachakna inenba Garo Hills-ni pilak A·chik manderangko, civil society dolrangko, aro songko-nokko dilenggiparangko ACHIK mol·molaha.
Indiani Constitution-o janapgimin bil-rengsiko aroba aro itihas-o galchipako man·anina, chongipa ba komigipa tribal jatrang jekai Hajong, Koch, Rabha, aro Mann-rangna Regional Council-ko bikotna on·china gita Regional Council Demand Committee (RCDC), Meghalaya-ni Governor CH Vijayashankar-ni dakchakaniko bi·aha.
Unaskang, Garo Hills-o songdonggipa chonchongipa tribal jatrangna bilake kamrangko ka·na aro silroroaniko ra·bana man·na gita Hajong, Koch, Rabha, aro Mann-rang jatrangna ge·sa Regional Council-ko songe on·china gita Regional Council Demand Committee (RCDC), Meghalaya-ni Governor CH Vijayashankar-o mol·molahachim
