PHULBARI: Garo Hills a·jao rorirangni skatang niamrangko ja·rikgija Tribal Trading Licence (TNT) donggija ba somoi bon·gipa (expired) licence-rangchi badingchiwalanirangko dakengani gimin jolni organisation-rang dingtang dingtang anti damrangoniko am·sandianirangko dakengon, A·chik Conscious Holistically Integrated Krima (ACHIK) dol North Western Zone-ni dilgiparang aro Phulbari Bazar Committee-ni member-rang baksa nangrimenba, TNT Licence donggija Phulbari bazaar-o TNT gri badingchiwalanirangko dakenggipa rorirangoniko am·sandiangaha.
Am·sandianiko dakanganio je rorirangan niamgri TNT Licence donggija skatang re·bae bading chiwalanirangko dakengachim aro jemangan TNT Licence-rangko GHADC-na adita bilsirangna gamna nanggipa tax-rangko gamgija update ka·chipgijaan bading chiwalanirangko dakengkuachim uarang gimikkon am·sandiaha. Indake bang·a licence donggijagiparangko rim·e ua salon uamangni dokkanrangko chipate badingchiwalaniko dondipataha. Una agreba, bading chiwalanirangko dakna gita TNT Licence-ko tarichengesa ba tax update ka·chengesa bading chiwalanirangko dakchina u·iatangjolaha.
Indake ACHIK, Garo Hills-o skatang rorirangni re·bae Tribal Trading Licence gri niamrangko ja·rikgija bading chiwale cha·enggiparangko am·sandianirangko salsa salgninasan dakangaijawa indiba mikkangchiba iandake niamrangko ja·rikgija licence gri bading chiwale cha·enggiparangko dingtang dingtang antidamrangonikoba rakbate am·sandianirangko dakangkugen ine jinmana parakatenba, “ TNT Licence dongjaode, rorirang bading chiwale cha·na man·jawa, manigija bading chiwalanirangko dakgenchimode rakbata ja·kuko de·anggen,” ine mikrakatangjolaha.
Phulbari antidamoniko TNT Licence-gri badinggiparangko ACHIK am·sandia
Date:
Share post:
