– Teseng Sangma
TURA: Krismas ong·na chong·motan Jisu Kristoni atchiani salna da·o bang·gija salrangsan dongaiahaon Garo Hills-ni pilak antio cha·gipa Bajarrangon Krismas-o gana ba sin·kario gana-chinanirangko cha·ani ringanirangko manderangni gisik nange bretokenganiko nikna man·engaha. Uandake Garo Hills-ni skotong songjinma Turani mongsonggipa Bajaroba gipin salrangona bate Krismas sepangon pringo dokan kuliaoni attam bajar chipaona manderangni jakchakgija Krismas-na an·tangtangni nanggipa bosturangko koros ka·tokenganiko nikna man·enga.
Tura Super Market-o ba·ra chola aro sendil jutta palgipa dokan nokgiparango Krismas bajarni gimin sing·sandion gipin salrangona bate Krismasni somaio bostu brebatenga indiba indakpilede ong·kuja inesan agantokaha, haida ian manderangni da·ororo online shipping ka·ani giminba ong·naba gnang. Manderangna bosturangko on·timnan dokan ge·sao sakbri ba sakbongarang rakkipilengachim, indake ong·genchimoba chola ba·ra aro sendil jutta palgipa dokkanrangode bregiparang bang·tingean badiaba mandeni bostuni damko sing·gipana aganchaknan somai man·pilgijanirangkoba nikengaha.
Krismas bajaro bostuni damrangni bidingo bregiparango sing·sandiskaon gipin salo dam namkaloba Krismas-ni somaiode bosturangni damnan jagokmanpil·a, unigimin sin·karini bosturangko wachini somairango ra·soe donon dam komikale man·pila ine Tura Bajar-ona koros ka·na re·bagipa Gambegre-oni me·apa saksa jaksamgnio bostu jakpilgija ra·bite aganangaha.
