GH-ni a·kawe jolrango bijolini bill bate sokengani gimin tom·aniko ong·atenga

SHILLONG: Garo Hills-o, mongsongbate West Garo Hills a·jani a·kawe jolrango bijolini bill-rang nangana bate sokrongengani gimin aro bijoliko on·anio maming namdapaniko nikna man·jaengani gimin da·al Sombar salni bako dingtangmancha tom·aniko Phulbari-o ong·atenga ine kobor on·aha.
West Garo Hills a·jani a·kawe jolrango bijoliko name man·jaengani gimin gitcham power minister-ba raken kamrangkode ka·ahachim indiba bang·e dingtanganiko nikna man·kujaenga ine jolni dilgipa saksa parakataha.
Bijoli on·aniko skangode FEDCO-sa jako ra·achim indiba ia kamko gipin company-na on·a intalan ia neng·nikanirangko namatchipna man·jaengaha ineba ua aganaha.
Ia jolrango nangana bate bijolini bill-rang sokengani a·selan songsalo bijoliko jakkalenggipa pilak nokdangrangan neng·nikanirangko chagrongna nangtokenga.
Bijolini bill-rangko bariatani bidingo janapatengon, bijolini bill-rangko bariatanichi, gama ge·anirangoba bijolini damrang rakbatgnok aro ian ia jolrango game ge·e cha·giparangna neng·nikaniko ra·baani gita ong·gnok ine dilgiparang parakataha.
Jolo songdongenggipa manderangni iandakgipa neng·nikanirangko chagrongna nangengani gimin da·al December-ni 22 tariko dingtangmancha jinma tom·aniko Phulbari-o ong·atenga aro ia tom·anio, da·o ong·enggipa MLA-rang, gitcham MLA-rang aro ia jolni dingtang dingtang dilgiparangba bak ra·na siengva.
Ia tom·aniko ong·atani miksonganiara, manderangni neng·nikanirangko apsan chanchirime, maini a·sel bijoli bill-rang bate sokenga aro iani bidingo sako gronge agangrikna man·gen, iarangko chanchianian ong·enga ine dilgiparang aganaha.
Bijolini kajinako bariatna gita sorkari ra·chakahama ba iako power distribution company dakengama, iarangni bidingo nambate tale ra·na nangenga ineba jolni dilgiparang parakataha.
Ia tom·ani ja·man, jolni dilgiparang aro MLA-rang, sorkari aro nangchakegipa ministry-ko gronge, ia jolrango bijolini kajinarangko komiatchina didianggen ine u·iataha.