SHILLONG: Meghalaya a·doko niam gri songdong a·chagiparangko champengna gita Meghalaya Residents Safety & Security Act (MRSSA)-ko jakkalchina a·dokni BJP, a·dok aro ma·mong sorkarirangko didiatenba, MRSSA-ko name jakkalgenchimode ian niam gri napsruke songdong a·chaaniko champenganio nambatgipa niam ong·gen ine parakataha.
BJP-ni state general secretary Wankitbok Pohshna-ni parakatani gitade, Meghalaya a·doko ‘ILP gita dakgipa’ niamko ra·gatani bidingo da·o dipet tale ma·sina man·kujaengani gimin niam gri napsruke songdong a·chaaniko champengna gita MRSSA-an nambatgipa niam ong·enga.
A·doko Inner Line Permit (ILP)-ko ra·gatchina dabie Meghalaya Legislative Assembly, 2019 bilsini December jaon resolution-ko pass ka·ahachim ineba Pohshna gisik ra·atpiltaianiko on·angaha.
A·doko MRSSA-ni dongsomanahani gimin janapatengon, name chanchichenggija gital niamrangko ra·gatna manchiani pal ia gitcham niamkon name ra·gate jakkalchina gita Pohshna didiataha.
MRSSA-ko name jakkalanichi, niam gri napsruke songdong a·chaaniko champengna man·gen ineba BJP-ni dilgipa aganaha.
‘ILP gita dakgipa’ niamrangko ua an·tangba name nipila dongkuja aro iani bidingo ua che·em che·em talate on·na man·kujawa ineba ua aganskaaha.
Meghalaya a·doko niam gri napsrukanirangko champengna gita adita salrangna skang ra·gatgipa Immigration & Foreigners Act 2025-o Inner Line Permit (ILP) gita dakgipa niamrangko on·dapna ma·mong sorkari ku·rachakaniko on·aha ine adita salrangna skangsan a·dokni Deputy Chief Minister aro Home (Police) Minister Prestone Tynsong parakatahachim.
Tynsong-ni parakatani gitade, adita salrangna skang, New Delhi-o Union Home Minister Amit Shah-ko New Delhi-o grongeani somoio, a·dokni Chief Minister Conrad K Sangma aro a·dokni gipin dilgiparang, ILP aro gital Immigration & Foreigners Act 2025-ko man·chape dingtang dingtang niamrangni bidingo chanchirimaha aro ia Foreigners Act-o ILP gita dakgipa niamrangko on·dapna Union Home Minister, ku·rachakaniko on·ataha.
“Meghalaya a·doko ILP gita dakgipa apsan niamko ra·gatna, Immigration & Foreigners Act 2025 baksa maikai ILP-ni niamrangko ra·dimna man·gen, uarangni gimin chinga Union Home Minister baksa chanchiaha aro ia chanchirimanio Union Home Minister-ba ILP-ni niamrangko on·dapna kusi ong·e ra·chakaha. Ia gital niamni ning·o Meghalaya a·dokkoba chel·chakgipa biap dake parakna mikkang antini gisepon Union Home Secretary, a·dokni Chief Secretary aro Director General of Police (DGP) baksa tom·e chanchirimangnaba gnang,” ine Deputy Chief Minister Prestone Tynsong parakataha.
