SHILLONG: Khasi aro Jaintia Hills a·jarango rel gari ra·baaniko jegaltokkuengoba, Garo Hills-ode Mendipathar Railway Station dongahani gimin jolni manderang, bang·en namgnirangko man·tokpaengaha.
Northeast Frontier Railway (NFR)-ni Chief Public Relations Officer Kapinjal Kishore Sharma-ni parakatani gitade, Mendipathar Railway Station, Meghalaya a·doko damsamangmang railway station ong·engoba, re·anggipa 2025 bilsini February 4 tariko, skanggipa changna ma·manti bosturangko salbaahani gimin bosturangko galonanichi jolni manderang bang·en namgnirangko man·engaha.
“2025 bilsini February 4 tarikonin Mendipathar Railway Station-o ma·manti bosturangko ra·bae galonna a·bachengaha aro February jaoni December jaona gimik ge 20.5 rake-rango bosturangko ra·baaha,” ine Sharma aganenba, da·o ia railway station-oni koela aro dingtang dingtang bosturangko gipin biaprangona salruranaba a·bachengahani gimin ian bosturangko salruraanichi bang·en namgnirangko ra·bana man·gnok ine parakataha.
“Mendipathar Railway Station-o bosturangko gatanichi aro ra·onanichi a·dokni economy-ko tang·doatna man·gen ine ka·dongenga. Meghalaya gita a·briarigipa biaprango dingtang dingtang bosturangko salruraaniara namen neng·beani kam ong·a indiba iandakgipa bosturangko rel garirango salaniara namen altubea aro damrangba komibata. Ia railway station-o bosturangko salanichi aro ra·baanichi karkanarangkoba tang·doatna dakchakani ong·gnok,” ine Sharma aganaha.
Adita salrangna skangsan, Mendipathar Railway Station-oni skanggipa changna koelarangko Jalalgarh-ona ge 42 rake-rango salangaha aro ia koelarangko kontachet minute 30-ni gisepon gatatna man·aha.
Mendipathar railway station, jolni manderangna bang·en namgnirangko ra·baenga
Date:
Share post:
