SHILLONG: Jinmani biaprango, mongsongbate bida budi on·chakram, hospital-rang, kal·susachakram, bus stand, depot aro railway station-rango katbranggipa achakrangko ra·galchina gita Supreme Court-ni rai on·aniko Shillong songjinmao achak jilgipa manderang jegalgrimtokaha.
Katbranggipa achakrangko, Prevention of Cruelty to Animals Act 1960-ni ning·o, Animal Birth Control (ABC) Rules 2023-o pangchake, tikarangko su·ani ja·man, dingtangmancha achakrangna dongimin biaprango donatchina gita Supreme Court, a·songni pilak a·dokrangnan ge·etaniko on·angahachim.
Iani bidingo Supreme Court, re·baenggipa January 7 tariko changgipin hearing-ko dakna siengon, Shillong songjinmao achak jilenggipa manderang, Khyndailad-o jinma tom·chimongenba, achakrangna on·gimin ia raiko ra·galpilchina Supreme Court-o dabiangtokaha.
Ia tom·e jegalanirangko dakanio achak jilenggipa manderang, achakrangko skango gitan apsan janggi tangna on·china aro ia niamko ra·galpilchina gitaba dabiangtokaha.
Ia jegalaniko dakanio achak jilgiparangoni saksa Tamanna Rahman, kobor ra·timgipa manderang baksa agangrikengon, uamang maming dolrang baksa bak donggipa manderang ong·ja indiba Shillong songjinmao songdongenggipa ramram manderangsan ong·aia ine talataniko on·angaha.
“Je manderangan achakrangko neng·nikani ine chanchia, ian kakket ong·ja ine anga aganna ska. Neng·nikanide mandeosa ong·a, matburingrango ong·ja. Achakrangko ra·galgenchimode batesa manderang neng·nikanirangko chagrongna nanggen,” ine Rahman aganaha.
Achakrangko biap damsano chipe dongenchimode ian COVID-19 gita dakgipa sajinmako ong·atani cholrang donga ineba ua mikrakataniko on·angaha.
A·songni gipin biaprango ra·gatgipa cholrangni gimin janapatengon, Goa, Mumbai aro Sikkim-ode tikarangko su·anichi, achakrangni katbranganiko aro rabies man·aniko komiatna man·aha ine Rahman talataniko on·angaha.
