SHILLONG: Garo Hills Autonomous District Council (GHADC)-o executive aro judiciary-ni bilrangko bak dakna ja·ku de·ani report-ko Meghalaya High Court bi·ataha.
Iani bidingo changgipin hearing-ko January 28 tariko dakna siengani gimin hearing dakani somoio report-ko on·china gita Meghalaya High Court, a·dok sorkari aro GHADC-ni official-rangna ge·etaniko on·ataha.
Social activist-rangoni saksa Flaming B Marak, Meghalaya High Court-o badi ka·doani ja·man, GHADC-o executive aro judiciary-ni bilrangko bak dakna ja·ku de·ani report-ko on·china Meghalaya High Court-ni Chief Justice Soumen Sen aro Justice HS Thangkhiew, ge·etaniko on·angaha.
Badi ka·gipa mandena General Administration Department-o Public Information Officer-ni aganchakani gitade, Executive Committee-ni Secretary aro District Council Court, Tura-ni Judge-ba apsan mandean ong·achim.
GHADC-o iandake executive aro judiciary-ko apsan mandean chalaienganiara niamni a·palo ong·a ine janapatengon, “Executive Committee-ni Secretary-an District Council Court-ni acting Judge dake kamko ka·enga ine ma·sina man·aha aro ian GHADC-o legislature, executive aro judiciary-ni gisepo dingtanggrikani dongkuja ine mesokaniba ong·aha. Ian Garo Hills Autonomous District (Administration of Justice) Rules, 1953-ni Rule 10 aro 11-ni kosako re·ani gita ong·enga,” ine Meghalaya High Court parakataha.
Koborko on·ani gitade, GHADC-o Executive Committee-ni Secretary SRR Marak, 2023 bilsini August 30 tarikonin District Council Court-ni judge-naba songako man·ahachim.
District Council Court-ni Additional Judge-ko songchina gita a·dok sorkariko didiatengon, da·o dipet SRR Marak-an, Council Court-ko name chalaina gita Additional Judge-ni kamko ka·angchengkugen ine High Court parakataha.
GHADC-o executive aro judiciary-ni bilrangko bak dakna ja·ku de·ani report-ko HC bi·ata
Date:
Share post:
